疑Anson Lo歌迷借送禮利誘DJ播歌 梁文禮出PO鬧爆

男子組合MIRROR成軍接近兩年，深受萬千少女嘅愛戴，佢哋去到邊都會有大量「鏡粉」到場支持，更掀起一股本地追星熱潮。今年MIRROR除咗推出單曲《IGNITED》之外，成員們都相繼被安排拍劇、拍綜藝節目及出solo歌曲等唔同工作。不過人紅自然是非多，成員Anson Lo（盧瀚霆）近日就負面新聞多多，繼早前疑被翻出與男拍檔表演時咀嘴片、疑似為社交平台買Followers及為新歌《Burn Out》MV買點擊，最新就有指疑似佢嘅歌迷借送禮去利誘DJ播偶像嘅歌。

前晚DJ梁文禮喺社交網站以「粉絲行為，偶像賣單」為題出PO，指903嘅DJ們都有收到某歌手歌迷嘅私訊，問點解收咗禮物後，但冇播佢哋偶像嘅歌，反而播另一歌手嘅歌。仲話如果偶像喺1月1日頒獎典禮得唔到獎項嘅話，佢哋就會唔再支持商台。梁文禮就反擊話如果DJ收禮物而去播歌係啱，屬於「賄賂行為」，而佢哋偶像喺頒獎典禮冇獎就唔支持嘅話，咁樣係屬於「威脅」。

雖然梁文禮喺個PO並冇指名道姓，但有報道指原因係MIRROR成員Anson Lo嘅歌迷，因不滿903DJ淨係播另一成員Anson Kong（江𤒹生）嘅新歌。

喺呢件事上Anson Lo未有正面回應，不過就喺IG連續出咗幾個story表示：「知道大家很支持我，希望一起正面地努力下去，不過急功，也不能負面，不是要去追求什麼，大家就是去互相欣賞每一次作品就已經足夠了。每一次錄歌也是希望有一個好作品，希望大家逐漸看到我的進步，是我最想得到的東西，承諾我會繼續努力。」、「在這年，有機會錄音，有機會出歌，已經是一件要感恩的事情。每派出一首歌，最重要的是大家能否感受到歌曲的意義和energy，其他的考慮，或許都看似重要，但其實都是其次。」及「謝謝每一位依然支持我的人，近日為第三首歌籌備當中，需要更多的正能量去完成，互相欣賞，互相尊重，才是現在大家最需要的。」

Anson Kong亦有喺IG出story向受影響嘅人致歉：「從造星到成軍，能夠出道已經係一件十分幸福嘅事，衷心感謝每一位粉絲令我們夢想成真。每一首歌都是我們學習的機會，希望每次都可以突破自己，比上一首進步。無論成績如何，有你們的支持已經很足夠，希望大家可以繼續開開心心地支持我們。我們只是一群剛上線的小伙子，十二子一定會繼續一起成就解鎖，未來還有很長的路大家一起走下去吧！再一次向被影響到的人說聲抱歉。」

而經理人花姐喺接受傳媒查詢時，佢就解釋話係一場誤會，佢亦有向梁文禮、麻利及歌迷會了解，經過查證後發私訊嘅認為係黑粉帳戶，相信唔係盧瀚霆歌迷會嘅成員。另外，花姐亦有就事件向梁文禮及麻利道歉及指事件冇影響Anson Lo同Anson Kong之間嘅友誼。