疫後復工捱通頂 龔嘉欣着長袖暴曬 變耐熱鐵人

無綫花旦龔嘉欣早前確診新冠肺炎，休息不足1個月即復工，近日更在35度炎熱天氣下，穿長袖衫與張振朗到石灘拍外景，見她狀態弗爆，忙至日出時分才休息，不改鐵人本色！

龔嘉欣本月初確診新冠肺炎，本來忙於拍攝無綫新劇《靈戲逼人》，無奈被迫停工休息，幸康復進度理想，休養不到1個月已可復工，日前她分享靚相並表示：「自己快樂的同時，也希望能為身邊的人帶來快樂，這是幸福的事。」

原來嘉欣日前已正式復工，前日在社交網上載與張振朗在石澳的石灘拍攝的短片，表示：「大暑之日外景石灘35度」，片中見張振朗蹲下休息，穿着長袖衫的嘉欣則撐傘，各自諗計「散熱」。至昨晨6時，她在家中拍下日出照及發文：「終於可以睡覺了，睡前可以看到這麼美的日出，雖然很累，也帶來了一點甜，幾小時後起床再工作。」高溫下拍攝外景，更忙至天光才有得瞓，可見其狀態不錯，而且相當捱得！

感謝劇組關心遷就

而她接受無綫娛樂新聞台訪問時交代近況：「呢兩日啱啱開工，本身都有少少擔心，始終停咗工兩個禮拜多啲，擔心會唔會唔係好適應？或者會唔會唔記得咗點演呢？但返到嚟一同大家做對手戲，又好自然演得番，好順利。」她感謝台前幕後的體諒：「監製導演佢哋個個都好好，好擔心我再返工時會點，加上依家天氣真係好熱，所以大家都有喺Rundown上遷就，等我同振朗唔使太辛苦。」她又感謝曾確診的朋友分享經驗，教她紓緩病情。