發哥返來喇!

【星島日報報道】過去五年,相信不少資深影迷皆有小弟的疑惑及不滿,會問:「哈,究竟周潤發,係咪好等錢使呢 ?」(答案當然——唔係!),有此一問,因發哥已踏進影壇四十二年,絕對應該知道乜戲應接、乜戲唔應該接,乜戲是粉絲期望、乜戲會令粉絲氣憤!唔使畫公仔畫出腸及指名道姓 ,周潤發過去四年,三度接拍某導演爛片,戲中輕佻硬滑稽Hea做,極度令人失望。事實,香港人過半與佢一同成長,絕對知發哥演技應該如何才合乎市場期望。結果,等呀等,終於在二○一六年才見到套《寒戰2》,再於今期來多套《無雙》,難怪,戲院內有人細細聲吟:「 ,呢個先係周潤發嘛,早前落 某導演手,簡直混帳!」 《無雙》由莊文強編劇及導演,拍得非常細緻,尤其偽鈔製作,程度之認真,肯定荷里活亦未必能拍出此水平。這套電影的前期蒐集資料工夫,必定嘔心瀝血,看得到導演對自己要求極高。 電影未上,已令人產生期望,故我上映第一天即撲入戲院睇早場,九點半開,三分二滿,已是一個信心顯示。結果感覺?並非滿分,尤其劇本扭呀扭呀扭,間中有點拖長來做感覺,長達一百三十一分鐘,冇乜必要。幸而,整套戲勝在枝葉茂盛,尤其槍戰連場,上世紀七十、八十年代的周潤發返晒 ,必可滿足這方面捧場者。 莊文強刻意用懷舊式Colour Tone,令整套片的品味提升,這種含蓄技術,暫時不見太多導演運用得精妙,非常有高檔的港產片味道,正! 《無雙》為迎合內地市場(黃金池也),故用上內地演員張靜初,演技不俗,有趣在,與本港演員周家怡併在一起時,觀眾即體會,乜叫內地味,乜叫香港味,同是華籍女性,分別非常之大。 此片兩大影帝同場,當然要鍊演技,發哥一貫灑脫,郭富城片頭片尾兩個人,可觀! 阿碌開咪 曾智華 專欄