盛勁為多謝麥明詩 麥大力預咗倒貼

月薪高達20萬的機師麥大力，在《衝上雲霄大選》摘冠即有劇拍，即使要倒貼都不擔心，自言每月只使幾千蚊，搵少啲都夠食！而盛勁為則公開多謝緋聞女友麥明詩，毫無避忌。

無綫《衝上雲霄大選》圓滿結束，冠軍麥大力、亞軍盛勁為、季軍陸煥恆和才藝大獎得主楊銘熙，昨日到電視城領獎，副總經理杜之克即席宣布開拍《衝上雲霄》短篇劇，安排一眾得獎者參演。

盛勁為直言要多謝緋聞女友麥明詩教路，亦會跟麥大力請食飯，他指對方贏得10萬元獎金，笑言若不夠錢請全部人食飯，就會叫對方幫手。問到獎金是否能為多月冇糧出幫補一下？他們表示只是近2個月冇人工，但有其他津貼，當中月薪達20萬的大力自言有儲蓄：「我單身，使好少錢。（每月支出幾多？）只係食嘢，都係幾千蚊。」

辭任機師踏星途

對於公司開拍《衝》短篇劇，他大感興奮：「雖然怕醜，但曝光多啲就會慣。（想同邊個合作？）好多都想，龔嘉欣都合作得好開心，曾經一齊表演。（學好廣東話？）當然要，我要減少講英文。（識個港女做女朋友？）我好多朋友都識中文，只係工作關係要講英文。（已經辭職？）係，會全身投入演藝界。（可能要倒貼？）我哋明白，最緊要開心。（挑戰大過揸飛機？）係唔同嘅挑戰！」

至於楊銘熙自爆10年前跟朱智賢是空中服務員訓練班同學，今次入圍，對方亦戥他高興，希望有機會合作。問可會請對方食蛋糕？他迴避問題，但承認知道對方早前捲入桃色醜聞：「點都支持佢！」