【真係造星】經理人收300萬捧富二代「摧毀樂壇」 盧覓雪唔知道菊梓喬是誰

《全民造星3》成為上年年尾熱話，一眾出道多年參加者因為節目而人氣急升，莫非「星」真係有得造出嚟？YAHOO TV 《Mean傾》節目就訪問咗份工真係造星嘅2位經理人 － 民迪同埋Kitty媽，講下點樣造星。

英皇盛世多得老翻當道？

Kitty媽以前係英皇藝人管理部經理人，千禧年後英皇真係「造星工廠」，謝霆鋒容祖兒Twins都係一捧即紅，Kitty媽憶述當年因為翻版盛行，好多國際性唱片公司收入銳減而縮皮，英皇係本地公司反而有資源捧新人，於是喺淡市突圍而出，亦證明造星最緊要有錢！

造星難 因為冇經驗

民迪由唱片宣傳人員做起，曾經「湊」過古天樂、陳奕迅同楊千嬅等。民迪見盡娛圈興衰，認為近年難以有「星」出現，係因為藝人演出機會少。民迪話以往周末同大時大節要帶藝人出show搵食，忙到「斷六親」兼「一年做三年嘅嘢」；但係而家市道淡活動少，掉轉係「三年先做到一年嘅嘢」，冇咁快累積到經驗，同時下藝人質素無關。佢舉例陳奕迅選完新秀冇耐，就已經有機會返內地拍旅遊節目《大江南北》，捱過自然賺到經驗。

捧富二代 同事鬧民迪「摧毀樂壇」

對比而家嘅藝人，未捱過之餘，仲有好多賺錢買花帶，甚至係拎300萬出嚟要民迪捧起嘅「有錢藝人」，搞到民迪俾同事鬧咁做係「摧毀樂壇」！主持盧覓雪好明白冇錢係入唔到娛樂圈，因為智能手機當道，人人都望手機多過睇電視，觀眾又好懷緬八九十年代紅到而家嘅藝人，後輩完全上唔到位。

姜濤冇人識？盧覓雪講唔出菊梓喬係邊個

姜濤橫掃叱咤我最喜愛大獎，引起「識／唔識姜濤」嘅爭議。雪姐都以《全民造星》為例，衍生出來嘅男團MIRROR同ERROR網上人氣超勁，廣告代言唔少，但係仍然有好多主流觀眾話唔識佢地；反而喺大台唱主題曲唱到入屋嘅菊梓喬，雪姐就噏唔出名！於是大家有個結論就係，而家娛圈各有山頭，要用以前「紅」嘅定義介定藝人係咪星？有難度！