真實版《殺人犯》？行徑古怪養女 疑是不老症中女
當年《殺人犯》呢套神片面世，唔少觀眾睇完都恥笑「不老症」呢條橋。
嗱！真金不怕洪爐火，而家真係有宗類似案件。
Kristine 同Michael呢對後來離咗婚嘅夫婦，2010年收養咗個烏克蘭女孩Natalia。
3年後，夫婦被指遺下Natalia不顧而去，被當局控告疏忽照顧。
Kristine 本身係育兒專欄作家，有個患自閉症嘅親生仔，
收養Natalia係當佢親生女一樣，但係佢地辦手續嘅時候，
發現Natalia嘅出生文件唔齊全。
當Kristine同Natalia沖涼，竟然見到6歲嘅囡囡，私處同成年人一樣，長出陰毛。
事情開始古怪，Kristine聲稱，Natalia意圖想殺死佢地，
包括想推Kristine埋去電鐵線網，又想喺咖啡落毒。
連醫生都診斷Natalia患上成人至有嘅情緒病，甚至從骨骼檢定，估計佢至少14歲。
當地法官亦判斷Natalia 1989年出生，而家差唔多30歲。
Kristine一家人都冇放棄個女，為佢報大學又申請身份證。
但係當家人決定由美國搬去加拿大，Natalia 又當自己係小朋友，
令Kristine 同Michael惹上官非。
Kristine 認為連法官都確定Natalia係成年人，佢地根本冇犯法，
希望可以還佢地一個公道。
掉轉睇，如果Kristine 同Michael真係壞人嚟嘅，
會唔會係佢地用《殺人犯》條橋嚟甩身？