真心嬲!網民聲討黑心後母 憂虐兒再現

親子王國 Baby-Kingdom.com

撰文:飛天中女Juicy媽

【親子王國分享】

平時Juicy媽食花生居多,但碌碌吓Forum居然見到個人神共憤嘅post!真心嬲,不得不寫文share出嚟。

 

係咁嘅,有個女人開post話,結婚時已經協議老公唔可以再理前妻生嘅兩歲仔。而家自己大咗肚,奶奶想接返個小朋友嚟照顧,問佢可唔可以畀個小朋友叫佢媽媽。樓主話佢已經冇阻止個小朋友叫老公做爸爸,但係叫自己做媽媽真係接受唔到!



睇到呢度,相信大家都同我一樣,內心有十萬個問號:人哋認自己老竇使你批准?

 

我都係第一次見一個post嘅留言可以咁一面倒,呢個女人上嚟尋求認同,結果反而被群起而攻。梗係啦!但凡一個正常人見到咁嘅言論,都冇可能唔嬲囉。

 

有網民心水好清,道出人哋先係血脈相連嘅一家人,樓主係外人,根本冇立場去「介意」佢哋見面或者一齊生活。更何況,真心愛個男人點解唔可以鍚埋佢個小朋友?奶奶畀小朋友叫佢一聲媽媽都係尊重佢嘅表現。介意件事嘅只有樓主,解決嘅方法應該係自己離開個男人,而唔係要人哋成家唔認粒仔囉,傻嘅咩!

 

退一步講,如果個女人如願以償,老公完全唔理親生仔,咁個老公都好冇人性啫!講真咁嘅男人都敢嫁?好多網民都講過一句:他朝君體也相同。唔係黑心,個男人都有前科,唔擔保唔會再次拋妻棄子喎。

 

同好多網民一樣,我睇完都戥個小朋友傷心,佢又冇做錯啲咩!唔明點解個女人就嚟做人阿媽都冇啲同理心,個小朋友已經冇完整嘅家庭,而家連長老嘅愛都要剝削。好似臨臨案一樣,又係呢啲離異男人同後母嘅case,咁睇嚟唔接小朋友一齊住都好,唔係香港分分鐘又多單虐兒案。臨臨件事引起咁大風波,但我都仲係覺得冷血之人應該只係萬中無一,普羅大眾都為事件感到痛心。而家先知原來啲自私冷漠嘅人可能就喺左近,仲可以上forum呻以為道理喺自己嗰邊。

 



真係希望後生仔女計劃先好生B,唔好畀小朋友有機會落到啲魔鬼手上。好嘅後父後母唔係冇,但撞正個黑心嘅,有咩事都喊唔返個小朋友。

 

而家呢個年代離離合合的確係話唔埋,就算有一日大吉利是離婚,都希望無辜嘅小朋友唔會變成受害者。

 

即刻Click入討論區一齊傾


即睇下一篇:'仔女都患癌,我擔心永遠無機會抱孫…'

其他內容