【睇到眼火爆】盤點上半年無綫劇集搶眼奸角

2019年話咁快完左半年,呢半年入面嘅無綫劇集中誕生唔少精湛演技嘅演員,佢哋將奸角演得出神入化,睇到觀眾咬牙切齒,令人留下深刻印象。而家就同大家重溫一下上半年有邊位搶眼奸角啦!

《大帥哥》馬炭(洪永城飾)

過往經常被批評演技浮誇嘅洪永城,今次被唔少觀眾大讚演技有進步。劇中馬炭(洪永城飾)有雙重人格,平時睇落好和善,但一激動時好似想死人咁。佢一激怒到極點嘅時候,佢雙眼會滿佈血絲,佢先後殺死麥先根(彭懷安飾)、佘南(古明華飾)、葉天嬌(譚凱琪飾)及羅義(徐榮飾)等人,殺人時毫不留情。另外,佢同「大帥哥」狄奇(張衞健飾)仲由兄弟變仇人,「黑化」馬炭更取代大帥哥,成為昇威鎮嘅新大帥,睇到觀眾咬牙切齒。最後佢被狄奇及章沅婉(蔡思貝飾)感動而悔改,與狄奇聯手炸死蒙大同(蔡國慶飾),但同時好不幸咁被炸死。

《大帥哥》馬炭(洪永城飾)
《大帥哥》馬炭(洪永城飾)

《荷里活有個大老千》螳螂(馬志威飾)

劇集除咗有唔少老戲骨之外,亦有唔少新鮮面孔演出,而當中最矚目嘅一定係飾演殺手「螳螂」嘅馬志威。劇中螳螂冷血、貪心,呃哂自己師傅唐偉(黃栢文飾)所有財產,後期仲殺死師傅,更加將師傅屍體拋落海,實行要「有徒弟就冇師傅」呢個道理。除此之外,佢仲發現祝大勇(吳雲甫飾)私底下放走丁小雨(王子涵飾),而將佢殺死,並棄屍廉政公署門外。壞事做盡嘅螳螂,最後吞槍自殺。

《荷里活有個大老千》螳螂(馬志威飾)
《荷里活有個大老千》螳螂(馬志威飾)

《荷里活有個大老千》文雄(湯鎮業飾)

湯鎮業喺劇中飾演隻手遮天嘅「華探長」文雄,喺劇集開頭佢設局陷害龍四(鄭則士飾)坐監,仲搶埋佢女朋友方百合(張慧儀飾)。壞事做盡嘅文雄,除咗有一班手下同佢到處蝦蝦霸霸之外,佢仲與螳螂同流合污、「大師兄」龐峰(秦沛飾)合作對付龍四同埋殺死方百,最終佢因為受賄而被廉署拘捕及入獄。

《荷里活有個大老千》文雄(湯鎮業飾)
《荷里活有個大老千》文雄(湯鎮業飾)

《福爾摩師奶》喬百川(林韋辰飾)

林韋辰飾演嘅喬百川睇落溫柔體貼,但原來佢為人陰險,背後隱藏好多黑暗秘密,係劇中個大奸角。喬百川與魏素嘉(陳瀅飾)有不尋常嘅關係,救咗素嘉之後,喬百川為咗向洋人報復,佢就培養素嘉做交際花,成為洋人嘅玩物。雖然素嘉受盡煎熬,但佢患有斯德哥爾摩症候群,所以一直甘心被利用。一個望落堂堂正正嘅男人,原來係一個社會敗類。最後佢當然係冇好嘅下場,被魏素嘉殺死及開膛,仲被埋屍沙灘。

《福爾摩師奶》喬百川(林韋辰飾)
《福爾摩師奶》喬百川(林韋辰飾)

《鐵探》萬晞華(惠英紅飾)

無綫重頭劇《鐵探》主要講述警隊高層嘅權力鬥爭及勾心鬥角,萬晞華Madam Man(惠英紅飾)貪權、好勝又自私,為咗做一姐去到好盡,佢不惜背棄並槍殺臥底下屬Bingo(姜皓文飾)、犧牲兩個仔及身旁同僚嘅性命。最終佢失去事業同家庭,得唔到佢渴望嘅一姐地位,一無所有。

《鐵探》萬晞華(惠英紅飾)
《鐵探》萬晞華(惠英紅飾)

《鐵探》「營長」鄧明陽(吳廷燁飾)

今次吳廷燁係劇中飾演越南黑幫老大「營長」鄧明陽,劇中就算冇對白,淨係憑佢兇惡嘅眼神,已經睇到唔少觀眾心寒。營長為人疑心重又心狠手辣,係一個高智商犯罪集團主腦!除咗係Madam Man嘅殺子仇人之外,佢仲壞事做盡,例如綁架劉彤彤(黃學盈飾)、炸傷谷永正(梁競徽等等)、殺死江麗瑤(何佩珉飾)、陸蔚喬(蔣祖曼飾)及邱勵傑(楊明)等等。佢最終自食其果,被程宇森被捕,被判終身監禁。

《鐵探》「營長」鄧明陽(吳廷燁飾)
《鐵探》「營長」鄧明陽(吳廷燁飾)

《鐵探》江正龍(楊潮凱飾)

平時俾人乖乖仔感覺嘅楊潮凱,今次喺劇中飾演令人討厭嘅黑幫大佬江正龍,佢喪盡天良、寸寸貢又不擇手段,經常出手打女朋友陸蔚喬,仲炸死咗莫世超(余德丞飾)同令陳國城(謝東閔飾)雙腿被炸到要截肢。除咗谷永正對佢恨之入骨,一班觀眾都睇到眼火爆呀!

《鐵探》江正龍(楊潮凱飾)
《鐵探》江正龍(楊潮凱飾)

《鐵探》山狗(林偉飾)

劇中飾演山狗嘅林偉,每一集眼神都好兇恨,絕對係一個殺個片甲不留嘅人。當中有有一幕山狗以行刑方式殺害Madam Man嘅大仔邱勵進(洪永城飾),令Madam Man飽受喪子之痛,好多網民睇到呢一幕都覺得山狗心恨手辣之餘,晞華去認屍時更係令網民一齊感受悲痛。山狗喺第五集被尚垶(袁偉豪飾)擊斃。

《鐵探》山狗(林偉飾)
《鐵探》山狗(林偉飾)