睇「港媽王國」信到十足十?旅行預「谷友」唔預老公?

親子王國 Baby-Kingdom.com

撰文:飛天中女Juicy媽

【親子王國分享】

唔知點解啲人總係覺得睇forum嘅人好似洗晒腦咁,講乜信乜。連BB來了都抽水要講個「港媽王國」!不過有網民就話,聽過有人開口埋口「forum啲人係咁講架」,手機不離手同「谷友」交流,連去旅行都預網友唔預老公啊陰公~咁又太極端嘅,正常人應該唔會咁樣玩到上晒腦掛。



但凡討論區都一定有口水post同膠post嘅,不過「港媽王國」呢類forum勝在有好多有用資訊,又唔可以講到百無一用,只係供一班師奶圍威喂咁囉。當然,好似「BB喊好唔好即刻抱」呢啲眾說紛紜嘅話題,如果有網民講「打死都唔抱得!」,唔代表睇完一定要跟足架喎。Forum都係畀個平台大家表達意見啫,冇話邊個講就一定啱晒。

就算唔喺forum度睇,流傳緊嘅育兒資訊都五花八門,難辨真偽喇。而家多咗個平台畀啲資訊集中咁話啫。過來人分享一啲經驗之談、或者有咩奶泵好用呢啲資訊,對新手媽媽好有用架!

好多網民都話,人係有判斷能力嘅,會信「港媽王國」信到十足嘅人,就算唔玩forum,都會信其他嘢嘅啫。都有人信晒蘋果動新聞、出行前一定要跟足通勝咁架。

套網民一句,睇吓揀咩嚟信喇,如果講緊呢期啲橙好酸呢啲,信下又無妨喎!

入討論區一齊傾


即睇下一篇:「慢讀」生活 發掘書本細節和趣味 提升閱讀理解能力

其他內容