【電影LOL】破解Netflix內容搜尋缺點 記住呢幾組數字!

·2 分鐘文章

新冠疫情再度爆發,陸續出現群組感染個案,娛樂場所暫時關閉,6點後又無堂食。咁多時間喺屋企,都係打機、睇劇、上網多,Netflix變成唔少人嘅娛樂首選!

Netflix會根據你嘅觀影紀錄推薦片單,有時用喺瀏覽「你可能喜歡的……」片單上嘅時間比起睇戲仲要多,不過推薦電影數量有限,界面數埋通常幾十套,部份仲會重覆。攞住搖控㩒嚟㩒去都未搵到想睇嘅戲或劇,其實Netflix藏片量遠遠多過你首頁見到嘅。

喺Netflix通常用片名、台前幕後人員名稱、國家名搜尋節目,不過會出埋好多唔關事嘅內容,有時想睇下鬼片但又諗唔起有咩名可以用嚟search時,要搵片睇都要啲功夫。

英國《獨立報》就同大家解決呢個問題。根據報導,Netflix平台可以用代碼搜尋就可以分門別類咁出哂個片單俾你慢慢㨂,譬如動作片個碼係1365,想睇動作喜劇就搜43040,漫威超級英雄類就用10118。

合家歡家庭片則可以783搜尋,細緻啲想以適合觀賞年齡分類亦得,2-4歲個碼係6218、5-7歲就以5455搜尋、8-10歲係561。至於動畫以7424分類,再細分成人動畫(11881)、Sci-Fi動畫(2729)等。

喜劇就以6548搜尋,如果想睇cult片或小眾電影就要記低7627同7077;藝術電影發燒友就要記住29764,其他種類嘅碼,好似愛情喜劇、戲劇、紀錄片就分別可以5475、5763及6839搜尋得到。

唔同類型電影各自有組數字代表,都分得相當仔細,有興趣嘅朋友不妨自行上網搵個完整分類編碼清單睇睇。不過用編碼搜尋只適用於Netflix網頁版<www.netflix.com/browse/genre/(輸入上述代碼)>,電視盒子同手機app係唔work嘅。

更多電影文章

【電影LOL.煲劇分部】原版《東京愛的故事》日劇 黃VIU有得睇

【電影LOL】戲院冇新戲 上Netflix睇刺激動作片《不死軍團》

【電影LOL】台灣文化局出post明抽廣電局新指引 呢套台片一定犯晒規

【電影LOL.退票安排】戲院再次停業 一文睇晒各大院線退票安排

【電影LOL】網傳內地廣電局又有劇本新指引 歷年來有邊啲規矩得啖笑?