破．地獄︱先人遺體特技化妝呈現真實一面被激讚製作認真 網民：感受到個種痛

電影《破．地獄》搵嚟黃子華與許冠文兩大笑匠合作，另外有衛詩雅、朱栢康、周家怡等演員演出，以殯儀館、生死教育作題材，成為近期電影作品熱話，於5日內衝破3000萬元票房，成為本年度香港電影開畫票房冠軍。除咗題材罕見，《破．地獄》被激讚製作認真。

《破．地獄》講述喺疫情肆虐生意蕭條嘅背景下，婚禮策劃師道生（黃子華飾）被迫改行成為葬禮經紀人。起初因理念不合與喃嘸師傅文哥（許冠文飾）產生衝突，因面對一位特殊嘅逝者文哥出手相助、親歷文哥與女兒文玥（衞詩雅飾）相處點點滴滴，也慢慢改變着道生對職業及生活態度。電影中，飾演白只太太、梁雍婷同性密友嘅先人熙雯由疑似係王嘉爾前女友嘅陳佩欣（Katrina）以另類身分參演，由特技化妝師透過特技素描及利用3D打印技術打造皮囊，間接演出；其特技化妝師Wilfred Wan於社交平台發布多張作品，透露今次最大嘅挑戰係熙雯嘅遺體特別道具（妝前）：「導演希望熙雯的屍體和禮儀師進行遺體化妝時可以進行互動；包括：注射空氣令開眼的假屍體同時合上眼睛；塞棉花到兩邊面部，使其肌肉膨脹；用小木棒撐著下巴，令屍體的頭部抬高。所以熙雯的特別道具假頭入面就利用咗好多3D打印嘅技術去製作多重的機關設計以達至上述效果。」又笑指自己係床下底嘅遺體操控員，某程度上同黃子華都叫做有對手戲。唔少網民又讚賞呢幕好好睇：「真係好感謝你哋香港專業化妝人員，令套電影帶比觀眾真實一面。謝謝你」、「熙雯呢幕好睇，謝謝你」、「呢幕好震撼，同時感受到個（嗰）種痛」等等。

此外，另一位先人「甄茵兒子」由小演員楊子漮演出，特技化妝師Wilfred Wan為佢化上屍體潰爛特技化妝，Wilfred Wan社交平台PO出潰爛傷口及合照照片，寫道：「唔知點解啲小朋友真係好中意好同我玩，辛苦晒你耐心咁等待～好叻」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！