硬撼王菀之搞到內傷 張敬軒裸跑博攞獎

張敬軒與王菀之不但在戲中大打出手,戲外亦Chok甫交足戲。
張敬軒與王菀之不但在戲中大打出手,戲外亦Chok甫交足戲。

歌手張敬軒首任賀歲片男主角,一於豁出去拍裸跑戲,笑指為藝術犧牲的舉動,全為博攞獎!片中他與老友王菀之大打出手,惟軒仔未有憐香惜玉,以骨頭硬撼肥嘟嘟肉地,結果搞到對方傷痕纍纍。

張敬軒與老友王菀之(Ivana)攜手合作英皇賀歲電影《超神經械劫案下》,片中除了有爆破、動作及開真槍戲份,還不乏雙方表愛意的場口,惟統統被導演硬Cut。雖然可惜,但Ivana爆料指軒仔的重口味裸跑戲也相當吸睛。

談到該場戲份,軒仔透露劇組特別圍封2、3畂田地來拍攝,相當大陣仗:「真係識Ivana咁多年,都未試過喺佢面前咁少布,其實又唔只得我除到咁少,仲有魏浚笙同白只。(咁大犧牲?)好多時為藝術犧牲都拎到獎,我都係想博攞獎,喺影壇上有所斬獲!(露兩點?)好多點,膝頭都有兩點,總之應有盡有!(有冇驚喜?)要睇年齡層,大家睇得韓劇多就係驚嚇。」

為免尷尬「幫襯」醫療隊

軒仔裸跑,Ivana亦有連場動作戲,笑指做打女非常有型,寄望日後能再接動作片:「不過要畀我早少少去操練,始終冇郁幾十年,不過今次武指哥哥都讚,一路加我打嘅戲份,但一路Cut軒仔啲戲,我都唔好意思講。」她又指與軒仔拍攝打戲時,為展現專業一面,兩人均棄用護墊,沒想到拍攝翌日便布滿瘀痕,軒仔卻安然無恙,令她非常無奈,對此軒仔表示:「我用啲骨撼你啲肉,其實我都內傷!(覺得自己有潛質做打星?)其實有啲動作戲未開拍,武師已率先拍咗Demo畀我哋睇,睇完會覺得Ivana係可以憑呢套戲拎動作女演員,我成個腦都係楊紫瓊同甄子丹,最後我哋打完出嚟嘅效果係牛池灣楊紫瓊同彩虹甄子丹。」軒仔更笑指每逢2人拍攝動作戲,即使簡單一下,劇組均安排醫療隊在場守候,為免尷尬,也會「幫襯」一番:「話晒人哋一場嚟到,咪坐埋去畀佢哋捽吓跌打酒同黐膠布。」