碧咸與陳定幫師傅探討屋企風水 曾為台灣女星擺風水陣即奪影后

英國「萬人迷」前球星碧咸（David Beckham）一直被視為封爵熱門人選，有傳佢將於下星期英王查理斯三世壽辰公布嘅授勳名單中，正式封為爵士圓夢。日前於澳門出席晚宴活動，被同場藝人鄧麗欣（Stephy）和陳妍希集郵；然而，碧咸一向熱愛中國文化，除咗曾經用中文寫揮春，今次仲向玄學家陳定幫師傅探討風水。

陳定幫師傅於社交平台分享與碧咸探討屋企風水嘅影片，寫道：「今次有幸係澳門倫敦人名匯Londoner Grand 同碧咸先生 David Beckham 閑談及分享吓風水，心感榮幸。真人好健談，好親切，Nice 到爆！勁有人格魅力！偶像」從影片中看到，碧咸透露自己家中睡房向西，陳定幫師傅則向其解釋家中風水嘅好壞，又表示睡房向西有助於商業及交流。

陳定幫師傅原名陳定邦，精通紫微斗數、八字、奇門遁甲、面相及各派風水等術數，自細受父親（陳果齊金剛上師）影響而接觸佛教理念，3歲已懂背誦心經，大學於澳洲悉尼大學就讀，主修IT，副修心理學，回港後創立陳定幫工作室 Clement Chan Workshop，與Bob林盛斌睇風水及算命而成好友，又喺對方介紹下認識現時太太楊錳霏，並於2014年結婚，育有兩個女兒。陳定幫透露，風水師唔係永遠無敵，當佢遇上難題時，Bob都會開解佢，相當老友。另外，陳定幫曾為台灣女星擺風水陣，之後該女星就奪得金馬獎影后獎項。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！