碧咸❤HK!精選萬人迷襲港型look

自從碧咸退咗役之後,咸迷就真係好幸福咯,因為咸爺一有時間就會嚟吓香港、去吓澳門同上海,傾吓生意呀、做吓代言咁。咁佢當然特別鍾意香港啦,可以順便幫老婆巡吓舖吖嘛。

佢今日又旋風式襲港喇,應AIA嘅邀請成為咗佢哋嘅保險大使,如果我個保險經紀係碧咸咁型嘅話,我願意將成條命奉獻畀佢架!

發完白日夢,講返正題!查實咸爺今年40有1架喇,雖然佢今日著住厚厚嘅西裝,但我哋咁近距離直擊,見佢副body仲keep得好好。

嗱!唔係我作架,咸爺喺2014年訪港嘅時候,一落地就第一時間喺Facebook update,佢仲話香港係全世界最靚嘅城市添呀。佢呢件casual嘅橙色tee,再加埋個眼鏡掛衫嘅造型,又即刻成為咗經典。

要數咸爺襲港最經典嘅一次,當然係佢官仔骨骨咁突然出現喺荔枝角街頭啦。其實咸爺引退之後,已經諗緊進軍唔同界別,又出自己嘅威士忌啦,仲同利豐老闆密密斟,可能想同老婆夫妻檔做時裝大亨呀!

咸爺粉絲都知佢2008年專登去尖沙咀搵香港首席紋身師沈龍威師傅紋咗一列八字真言「生死有命富貴由天」,原來當年沈師傅提議過咸爺紋另一組八字真言「物極必反否極泰來」,不過咸爺話佢當時心境仲未去到嗰個化境階段,所以揀咗前者,仲話以後當佢進入化境,一定會返去搵沈師傅架!

Related Articles