《神奇女俠》以色列美人姬嘉鐸索爆又打得

東方新地

更新日期： 2017年6月5日上午6:43

《神奇女俠》上映不久已經好評如潮，全球票房大收，其中由以色列女演員姬嘉鐸 (Gal Gadot) 扮演神奇女俠，好多人都覺得佢完全演活了Wonder Woman呢一個經典角色！呢一位以色列索女其實來頭不少，現年32歲嘅姬嘉鐸喺04年摘下以色列小姐后冠，09年客串《狂野時速4》開始受到觀眾注目，現時再憑《神奇女俠》創高峰！唔講唔知呀，姬嘉鐸仲曾經為以色列國防軍服役兩年！

姬嘉鐸《神奇女俠》一炮而紅

猶記得去年的《‪蝙蝠俠對超人：正義曙光》口碑一般，不過由姬嘉鐸飾演嘅神奇女俠非常搶鏡，出場時間唔多但已經令人留下深刻印象，迷倒觀眾！今次《神奇女俠》獨立電影係講述神奇女俠成為超級英雄之前嘅故事，英勇善戰嘅亞馬遜公主戴安娜一直在隱世的荒島生活，直到一個美國空軍機師因墜機意外闖入，告訴佢哋外面的世界烽煙四起，。戴安娜決定離家，平息所有戰爭。佢與這位機師並肩作戰，終結一切戰爭，而且發現自己嘅潛能和早已注定的命運。

以色列小姐冠軍

姬嘉鐸自小已長得非常標緻，早喺2004年參選以色列小姐並成功摘下后冠，當年只有19歲嘅佢贏得以色列小姐後，去到厄瓜多爾參選環球小姐，可惜15強止步。

曾經當過兵！

姬嘉鐸 19歲選環球小姐失敗之後冇即時入娛樂圈，而係加入咗以色列軍隊服役兩年！唔知佢係《神奇女俠》入面嘅好身手係咪係軍隊度練成㗎呢！退役之後重返校園讀法律，直至參加邦女郎的試鏡先至逐漸走到幕前。

《狂野時速4》鋒芒畢露

姬嘉鐸 09年喺電影《狂野時速4》客串Gisele Yashar一角，開始受人注意，喺上年嘅《蝙蝠俠對超人：正義曙光》（Batman v Superman: Dawn of Justice）入面，Gal Gadot化身成為Wonder Woman，雖然出場時間很短，但都令到好多觀眾留意到佢，而且對Gal Gadot主演嘅《神奇女俠》期待度上升！

曾想退出娛樂圈

日前姬嘉鐸喺節目《The Tonight Show Starring Jimmy Fallon》就透露自己喺演出神奇女俠之前，曾經因為多次試鏡失敗感到心灰意冷。「這個行業，被拒絕是很無情的…我試過很多次幾乎成功的試鏡，每次都是幾乎選中我，但之後依然是另一個試鏡，重重覆覆…」多次試鏡失敗導致Gal Gadot猶豫應唔應該繼續演藝工作。