禁揸兩個轆 驚有意外 方力申被批姻緣到 好快做老襯

單身多年的藝人方力申昨日現身活動時，透露被堪輿學家批算兩、三年後會遇到真命天女，更有機會拉埋天窗，否則要多等十年！他笑言近期獲不少人介紹女生，有望愛情降臨！

方力申（小方）昨日以「愛心之星」身份出席「博愛單車百萬行2023」，他表示向來喜歡單車運動，但平時多在健身室做，甚少在戶外踏單車。他表示最近看流年運程，堪輿師傅禁止他駕駛兩個轆的電單車，他無奈說：「我每個星期都會同張繼聰、森美、張振朗一齊揸電單車，我話我哋只係兜風，好斯文，唔會攝車，有冇咁嚴重呀？師傅好輕描淡寫咁講早幾個月前同另一個人講唔好潛水，但嗰個人冇聽，最後走咗啦。所以依家唔可以揸電單車，惟有踩單車感受吓，不過好彩我仲有部3個轆嘅電單車，都可以同班朋友一齊出去兜風。」

馬詠茹拒談電影風波

問到師傅可有指點他姻緣？小方笑言都是差不多，慢慢會好：「話近呢兩、三年會遇到，仲會埋單，如果埋唔到單就要等多十年八年。（你有冇留意吓身邊人？）留意咗幾年都冇，隨緣啦！（發掘吓？）最近大家活動多咗，真係多咗朋友同我講要介紹女仔畀我，之前只係得Bob（林盛斌）介紹。（有冇畀相你睇？）唔畀㗎！吓吓睇相就錯失咗大家嘅緣分，唔係淨係睇樣。」笑言父母已「放棄」他，故沒有催婚，又自爆以前曾相睇：「試過五、六個人一齊出嚟食飯，當係交朋友傾偈。（你眼角高？）我唔啱佢啫！」

另外，電影《給十九歲的我》主角之一的馬燕茹姐姐馬詠茹，是前港隊單車隊代表，她有現身支持。對於電影風波，她認為應該將焦點放在活動上，加上不太清楚電影，故不便評論。