私人寶庫:《星矢》《龍珠》陪住長大 黎諾懿傳承百件Figure畀個仔開博物館

·3 分鐘文章
黎諾懿珍藏逾百件「星矢」Figure,全部未拆盒!
黎諾懿珍藏逾百件「星矢」Figure,全部未拆盒!

藝人黎諾懿為圓兒時玩具夢,近20年來狂買動漫主角Figure,擺滿床下底兩大個地台,單是《聖鬥士星矢》已有逾百件,全部齋睇唔拆盒,粗略估計所有珍藏總值逾50萬元,不過即使多多錢也不會割愛,因決定傳承給兒子,待他長大後舉行展覽,向下一代講解年代歷史。

小時候已是動漫迷的黎諾懿,對《聖鬥士星矢》、《超時空要塞》、《變形金剛》、《黃金戰士》等經典尤其喜歡,由於屋企窮困,根本沒有多餘金錢買主角的副產品,直至長大後打工,每當完成工作他便會買一件玩具獎勵自己,後來經濟許可,便愈買愈瘋狂,見到喜歡即買,結果一發不可收拾。

WALL-E見證夫妻情

於芸芸珍藏中,「星矢」可說是他儲得最齊全的動漫主角,喜歡全套擁有的他,只要稍為缺一,即用盡方法「尋寶」:「一個系列12隻,有次搬屋覺得唔見咗一隻,後來要炒價買返嚟,好在太太大量畀我咁做。耐不耐廠家又會Upgrade啲主角等你哋買,好似用雅典娜血滴落去,就會變成新生聖衣,每隻都會多對翼,之後又出特別版,關節動作靚啲,收藏家一定買,所以儲到依家係最多嘅一種,大約有120件左右,本身對希臘雅典、12宮好鍾意,星座又好似關自己事,加上細個睇呢套卡通片陪住長大。」

談起玩具,黎諾懿即變成大細路滔滔不絕,從「星矢」、「龍珠」再到動畫《太空奇兵.威E》主角WALL-E,他也能道出收藏的原因。

「細個睇《龍珠》,好希望有神龍出現幫我達成願望,長大後就儲佢啲產品。WALL-E係當年同太太拍拖時睇過套戲,佢好鍾意,我就搵人整個一比一,用鐵做嘅原裝出嚟,係我哋定情信物,最有紀念價值但唔值錢。(成屋玩具買咗幾多錢?)唔敢計,因為得閒又買,淨係計百幾隻聖鬥士,1隻1,000,都十幾萬,仲有其他呢!」雖然他唔敢計,但估計其珍藏總值逾50萬元!

視百件珍藏如命的他,坦言即使有人出天價也不會賣,並決定把寶貝全數傳承給兒子,他說:「之前打開畀佢睇,佢碌大隻眼問係咪佢o架!希望佢大個識珍惜,唔介意佢拆,但唔好賣,留低年代歷史,依家佢4歲,20年後應該變晒古董,如果佢有錢就整個博物館畀人欣賞,介紹畀下一代認識我個年代係玩咩長大嘅。」

地台收納 最緊要吸濕!

不少人喜歡把珍藏品放於家中看得到的地方,黎諾懿卻寧願在主人房床底打造兩個大地台收納,並將之分門別類,非常整齊,地台上則是床褥,笑言晚晚瞓於玩具上,感覺最安全。他更分享打理方法:「我啲玩具唔拆盒,只在乎擁有,啲盒點樣保持新淨呢?放床底唔好以為安全,紙會吸濕令到發霉,所以久不久要打開透透氣,用埋防潮同防蟲包。」

黎諾懿笑指手上的WALL-E「不值錢」,但是他與太太的定情無價寶。
黎諾懿笑指手上的WALL-E「不值錢」,但是他與太太的定情無價寶。
集合7粒龍珠召喚神龍……唔止黎諾懿,相信不少《龍珠》迷都諗過!
集合7粒龍珠召喚神龍……唔止黎諾懿,相信不少《龍珠》迷都諗過!



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能