【秦煌入院】藝名意思竟然係「無恥」 「肥舅父」飲完酒跌落海入ICU執返條命

72歲甘草演員秦煌尋日返TVB出席《踩過界2》宣傳活動時，因為喺電視城門口「差錯腳」跌倒而要送院，一度有傳佢心臟有事。後來秦煌澄清冇其他身體毛病，不過膊頭骨裂要留院觀察。

今次唔係秦煌第一次出意外入院，2008年秦煌喺長洲同李家聲等一班朋友飲完酒，坐渡輪出市區時喺碼頭跌落海，頭部撞到木樁受傷一度昏迷，要由直升機送院搶救，一度入住深切治療部，好在一個禮拜後就康復出院，執返條命！

秦煌應該廣為七八十後電視精所認識，七八十年代佳視及TVB分別拍過《射鵰英雄傳》，都係由秦煌飾演周伯通，老頑童形象深入民心。1992年嘅處境劇《卡拉屋企》，秦煌飾演嘅肥舅父（廖仲德）亦都係佢嘅代表作，劇集收視高之外，秦煌同戲中阿仔「泰臣」（吳鎮宇）仲組成男團「豹父子」出唱片！在今年的黑色喜劇《反黑路人甲》中都見到他的身影，劇中佢飾演「德順」。

原名梁日成嘅秦煌，28歲時因為任職商台主持人嘅太太莫佩雯介紹而認識商台創辦人何佐芝，繼而有機會參與佳視《射鵰英雄傳》試鏡而入行。至於秦煌呢個藝名，原來係由大導演李翰祥所起，當時李翰祥開拍電影《軍閥趣史》，秦煌飾演的軍閥角色名叫「秦煌」，皆因呢兩個字夠架勢（秦始皇）而且有「無恥（始）」嘅含意，襯晒個角色。

秦煌接受訪問時提到，當年因為工作關係，無咩時間放喺家庭之上，作為父親唔會點管仔女同時亦唔多溝通，而太太莫佩雯3年前逝世，生前同秦煌已經分居，對方曾經提出離婚6次，但秦煌每次都拒絕，他強調大家係性格不合，自己亦無緋聞，自己只係中意玩。