雅虎香港新聞 【移民懶人包】一文睇哂六大熱門國家物價＋移民方法
近年越嚟越多香港人考慮移民，除咗要做定搜查了解唔同地方嘅移民資格外，仲要計吓當地嘅生活水平，真係諗到就頭都大。唔知係邊到入手？今期Yahoo著數專員就為大家整合英國、美國、澳洲、加拿大、台灣、新加坡等六大港人熱門移民國家嘅物價同移民方法，一文睇哂邊度同邊種簽證最適合自己。
1. 台灣
台灣鄰近香港，雖然係講國語，但因為兩地生活文化差唔多之餘，台灣嘅文化氣息比較濃厚，絕對係好多年輕家庭移民心水之選。台灣嘅投資移民門檻亦係六個國家入面最低，只需要600萬新台幣（約165萬港元）嘅創業資金或投資。如果你從事專業領域，擁有相關嘅執業資格（例如：會計師、建築師同醫護人員），便可以申請專才移民。
另外，你亦可以考慮升學移民，只要喺台灣大學畢業，通過「僑外生留臺工作評點配額制」評核，及月薪達38,000新台幣（約1萬港元）或以上，留居台灣至少5年即可。
2. 新加坡
新加坡嘅社會文化同香港相近，都係中西文化滙聚、華洋雜處。當地通行英文、廣東話同普通話，港人溝通無難度。雖然佢嘅物價指數喺東南亞地區內屬於偏高，但其完善嘅醫療同教育制度絕對適合港人安心移居。新加坡嘅投資移民門檻亦比同區高，資金需達250萬坡元（約1,500萬港元）。所以大部分人都會撰擇創業或技術移民。創業移民只需要5萬坡元（約30萬港元），當中以創新科技最受當地政府歡迎。而技術移民最低薪金則需要每月有3,600坡元（約2.1萬港元），申請人通常從事工程同科技業 。
3. 澳洲
擁有大自然景色嘅澳洲，除咗係渡假聖地，優越嘅居住環境加上理想嘅國民福利，呢啲都令澳洲成為唔少香港人嚮往移居嘅國家。傳統上，移民澳洲方法都係分有創業、投資同技術移民三種。其中「 商業創新簽證」資產需要有80萬澳元（約470萬港元），「商業投資簽證」則需要資產225萬澳元（約1,300萬港元），兩種簽證有效期為4年，其後可申請永久居留權同入籍。至於技術移民，當局表示2020至2021年度嘅澳洲簽證將會有17種職業優先獲批，當中包括機械工程師、軟件工程師、醫生註冊及護士等。
澳洲政府更於今年7月宣布延長臨時技術簽證及畢業生簽證嘅簽證期至 5 年，其後可申請成為永久居民。值得留意嘅如果於偏遠地區（即悉尼、墨爾本同布里斯本以外）生活工作嘅話，更可加快申請永久居留權。
4. 英國
英國既有大都市嘅配套，又有鄉村嘅情懷，任君選擇，所以一直都係香港人移民嘅理想地。雖然物價較高，但移民門檻卻係多個英語國家之中最低。過往移民英國嘅方法都主要離唔開透過投資、創業或工作，申請臨時居留簽證， 連續居住滿 5 年便可得永久居留權，再而可申請入籍。投資移民最低門檻為200萬英鎊（約2,100萬港元），至於工作簽證則只需要大學畢業，有英國僱主擔保，並且年薪不少於3萬英鎊（約31萬港元）即可！
隨著英國政府宣布於2021年1月31日起實施嘅「香港BN(O)簽證」（俗稱「5+1 計劃」），擁有BNO資格嘅港人更加係多一個簡單方便、「零成本」嘅移民途徑！申請人喺英國連續居住5年後即可申請定居，住多 1 年便可申請入籍。無學歷要求，居住期間可以工作和讀書，但無需要有僱主擔保。而親屬亦可以受養人身份申請簽證。5年簽證費為 250 英鎊（約2,600港元）。
5. 美國
美國係一個文化多元嘅國家，有多間高等學府，又較多發展機遇，可算係港人心儀嘅移民國家。申請綠卡（即永久居民身份）大致可以分為四個途徑：投資移民、技術移民、親屬移民同抽籤移民。投資移民需要投資最少50萬美金（約380萬港元），並且要創造 10 個全職就業職業空缺。美國嘅技術移民相比起其他英語國家嘅要求低。最低門檻嘅簽證要求，學歷只需要達到工作要求嘅水平、2年工作經驗加上當地僱主擔保，但無最低薪金要求。至於主要靠運氣、每年約有5.5萬個名額嘅抽籤移民，就係2020年度列明港人唔可以參與。
成功得到綠卡嘅永久居民，再喺美國連續居住滿5年就可以申請入籍，成為美國公民。
6. 加拿大
一直以來移民加國嘅限制同條件較多，除咗有只限魁北克省嘅投資移民計劃（資產需要至少有200萬加元，即約1,200萬港元）外，其餘就有技術、技工同經驗移民，但其職業須屬管理工作，或需要大學學位或專科文憑嘅專業職位。
但因應《港區國安法》嘅實施，同為咗吸引高學歷嘅年輕港人到當地工作，加國政府亦宣布會於2021年推出新嘅移民措施，大大放寬移民要求。只要喺過去5年任何地方大專畢業嘅港人，就可以申請為期3年嘅工作簽證，之後都會有獲途徑申請成永久居民。而現居加國嘅港人，只要符合學歷同語言要求，並且有 1 年加拿大工作經驗，即可申請永久居留權。
按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！新人更可即時換領限量新人禮，立即下載！
相關連結：
