【竟然冇Gin Lee】叱咤我最喜愛最後五強公佈 快啲嚟睇最新走勢

《2020年度叱咤樂壇流行榜頒獎典禮》將於2021年1月1日以實體形式舉行,屆時不設現場觀眾,只有歌手們及音樂人出席。樂迷們唔使失望住,大家亦可以透過網上及叱咤903即時收睇現場盛況。過往由現場觀眾即場票選嘅「我最喜愛」獎項,亦改為網上投票,早前「我最喜愛的男歌手」、「我最喜愛的女歌手」及「我最喜愛的組合」開始接受投票,而最後5強名單亦已經誕生。想知邊位歌手&組合入5強嘅話,快啲轆落去睇啦!

「我最喜愛的男歌手」最後5強
「我最喜愛的男歌手」最後5強

「我最喜愛的男歌手」最後5強分別係林家謙、姜濤、許廷鏗、陳卓賢(Ian)及鄭中基,佢哋各人均有推出大熱作品,例如林家謙《拼命無恙》&《一人之境》、鄭中基《My Only One》、許廷鏗《無力感》、姜濤《孤獨病》同埋陳卓賢《正式开始》&《鯨落》。睇返留言,除咗姜糖繼續洗版式留言撐姜濤之外,林家謙亦得到唔少網民留言支持。

「我最喜愛的女歌手」最後5強
「我最喜愛的女歌手」最後5強

至於「我最喜愛的女歌手」方面,最後5強分別係AGA、Serrini、方皓玟、林二汶及衛蘭,佢哋分別推出咗大熱作品,包括AGA《See You Next Time》、Serrini《網絡安全隱患》、方皓玟《All We Have Is Now》、林二汶《再聚》及衛蘭《低半度》&《帶走你的垃圾》。上年呢個獎項嘅得主係方皓玟,唔知佢有冇機會冧莊呢?另外,有唔少網民對Gin Lee冇得留低感到疑惑同不滿,紛紛留言:「我最喜愛的Gin Lee呢」、「為何沒有Gin Lee」及「還我Gin Lee」等等。

「我最喜愛的組合」最後5強
「我最喜愛的組合」最後5強

最後當然輪到「我最喜愛的組合」,最後5強分別係Dear Jane、Dusty Bottle、ILUB艾粒、MIRROR及RubberBand,佢哋今年嘅大熱作品有Dear Jane《銀河修理員》&《哀的美敦書》、Dusty Bottle《Break It Down》、ILUB艾粒《奇妙事不斷有》、MIRROR《IGNITED》&《One And All》及RubberBand《First Date》&《百毒不侵》。佢哋都各有支持者,可以話係叮噹馬頭。

三個獎項到底花落誰家?現時真係好難預計,如果想你心目中嘅男、女歌手及組合拎獎嘅話,大家就喺11月30日至12月4日把握機會投票啦!