童星張預東拍片分享離巢原因 : 講到想反胃

·3 分鐘文章
童星張預東拍片分享離巢原因 直指觀眾見到Logo就想嘔同熄電視
童星張預東拍片分享離巢原因 直指觀眾見到Logo就想嘔同熄電視

童年出身嘅配音員張預東(東東)多年嚟陪伴住香港人成長,佢喺無綫效力22年,早前拍片上載到社交平台宣布離巢消息,除咗多謝大家一直以來嘅支持之外,佢亦分享與無綫有好多想法唔一致,所以決定離開。至於未來嘅發展,東東就話自己係裸辭,所以想暫時休息一下先。去到前日,東東拍短片上載到影音網站個人頻道分享離巢原因。

一開始,東東就已經講出離巢原因,主要係話舊公司與觀眾對立及唔聽取觀眾意見,咁無論表演有幾高質素、投放幾多製作費及工作人員幾俾心機都好,觀眾只要見到個Logo就已經想嘔,或者係想熄電視同轉台,咁樣就浪費咗好多演出者嘅心機。佢亦話無綫係有觀眾,不過佢好肯定無綫而家嘅目標觀眾同佢嘅目標觀眾唔同,但佢又唔想為呢批人而表演,所以選擇離開。另外,佢仲話呢幾年講咗好多唔想講嘅對白,甚至講到都覺得反胃,例如係「全港第一」、「領先全球」及佢認為最難聽同嘔心嘅「帶領樂壇」等等。

之後,東東亦講到無綫清水灣電視城年代,話嗰陣時話做無綫好威,好多人都想入電視城參觀,甚至攞門票睇《獎門人》或《勁歌金曲》,但好多人攞完都會後悔,因為電視睇一個鐘嘅節目,喺現場錄影可能就要三個鐘頭,中途又唔比你去廁所,唔少人都會覺得唔過癮。同埋大家喺睇一啲訪問時,唔少藝員或導演都會話拍得好辛苦,雖然佢哋口就話辛苦,但心入面係好享受,因為大家都係想做好呢一件事。

東東仲話以前嘅高層好啲,因為佢哋會與演員、配音員及製作組打成一片,好似會喺清水灣電視城入面間canteen一齊飲酒、食煙同吹水。不過而家就好唔同,好似佢以前部門最高級嗰個人係從來冇同佢哋溝通,所以佢話做行政或者管理一定要知道下面及前線嘅人面對咩情況、佢哋有咩唔開心,或者佢哋覺得咩嘢可以改善等等。最後佢仲話覺得而家啲高層唔係「離地」,而係唔「同行」,唔同低層「同行」。

影片截圖
影片截圖
張預東
張預東
影片截圖
影片截圖
影片截圖
影片截圖

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!