「糉」有得揀！ 8大鹹甜新糉+素糉 榴槤/綠茶口味都有！

正所謂有得揀，先至係老闆。嚟緊端午節，當然都大把糉你揀啦。開飯仔精心挑選咗8款創新口味嘅糉介紹畀大家，鹹甜口味都有，最特別嘅係居然連榴槤、綠茶口味嘅糉都有，完全超出想像呢，有興趣嘅要試試咯。

麥米花生蓮蓉鹼水桂花糉  龍景軒

酒店中菜行政總廚設計咗2款新口味嘅糭，一鹹一甜，分別係雞樅菌元貝響螺糉同麥米花生蓮蓉鹼水桂花糉。前者食材矜貴，微辣帶嚼感；後者蓮蓉餡仲要係流心，享用時可以加埋桂花蜜，令層次變得更豐富。購買禮盒嘅話重會送埋雪片蜜蘭單叢茶葉呢。

西班牙黑毛豬XO醬糉  大師姐

一向有出品自家XO醬系列嘅大師姐，就將自家火腿XO醬加入製作新糉——西班牙黑毛豬XO醬糉。100%香港人手製作，無添加味精、色素或防腐劑。成隻糉都非常惹味，微微香辣，唔使再點其他醬料，專心享受糯米香同肉香就可。

門市：海港城City’super、太古城APITA（25/5開始）

榴槤咖央醬糯米甜糭  天外天

眾所周知，Hotel icon最出名就係佢哋嘅榴槤Buffet，今年端午節首次推出糭子禮盒，除咗有傳統裹蒸糭外，更有創新嘅榴槤咖央醬糯米甜糭！榴槤甜糭有三隻色，綠、黃、藍分別以班蘭、黃薑同蝶豆花製成天然色素。之後再釀入榴槤果肉同埋由新鮮班蘭葉汁所製成嘅自家製榴槤咖央醬，糯米仲有香甜嘅椰漿味，榴槤控必試。

綠茶紅豆蓉西米糉  點盒子

川菜廳出嘅糉當然都充滿四川嘅風味，其中有款四川麻辣野菌黑豚肉黑糯米糉，麻香突出，食糉都有種刺激感。另外，將糉當做甜品都唔係冇得諗，佢哋有款綠茶紅豆蓉西米糉，加咗果皮製作，幾清新架。

韓式泡菜黑豚肉粽  奇華餅家

泡菜呢個食材真係幾百搭，同端午糉一齊食都幾夾。老字號餅店推出新口味韓式泡菜黑豚肉糉，糯米索晒香辣嘅泡菜汁，係新嘗試嘅配搭，食咗咁多年糉試下新嘢，話唔定有驚喜。

素粽

愈嚟愈多朋友仔食素，所以而家都有唔少酒店同餐廳推出素糉，照顧唔同人嘅需要。

八寶薈萃新豬肉素裹蒸糉  逸東軒

佐敦呢間星級酒店，以全植物性材料製成嘅OmniPork 新豬肉，代替新鮮豬肉入饌，製作八寶薈萃新豬肉素裹蒸糉，八寶食材包括日本花菇、紅腰豆、栗子、花生、蓮子等，而新豬肉獨有嘅純素蛋白質配方主要來自豌豆、非基因改造大豆、冬菇同米，食落有淡淡豆香。

三色有機養生糭  Royal Delights

三款有機糭包括松茸桂圓薏仁糭、羊肚菌金栗新豬肉糭同埋桂花藜麥甜豆糭，各有特色。松茸桂圓薏仁糭既有香菇醬又有靈芝菇同雲南松茸，成隻糭都充滿菌香；羊肚菌金栗新豬肉糭味道濃郁，而桂花藜麥甜豆糭就係口感同顏色都最豐富嘅，集齊紅腰豆、大紅花豆、大白雲豆、黑豆同白奶花豆5種豆，加埋有機三色藜麥製作，更滲出陣陣桂花嘅清甜。

養生牛肝菌五色豆素粽  富豪酒店

各位注重健康嘅朋友仔，食糭最怕就係食到好大嚿肥豬肉。呢款啱晒，加入黃豆、綠豆邊、紅腰豆、眉豆同黑豆，另有雲南牛肝菌，健康得嚟一樣充滿豆香同菌香。

文：Kar