【竹內結子逝世】日劇女王雙線發展 《藉著雨點說愛你》催淚經典

40歲日本女星竹內結子尋日凌晨被發現於寓所昏迷,送院後不治,初步消息指竹內結子懷疑自殺輕生。

16歲入行嘅竹內結子,1996年憑電視劇《新木曜的怪談 Cyborg》出道,3年後參演NHK晨間小說連續劇《明日香》開始為觀眾認識。2001年係竹內結子上位嘅一年,呢年佢拍咗3套分別同Johnny’s 事務所旗下藝人合演嘅劇集,包括夥拍SMAP中居正廣嘅《白影》、拍住TOKIO長瀨智也嘅《女婿大人》以及同堂本剛合演嘅《熱血教師》。

2002年竹內結子再上一層樓,通常由一線紅星孭飛嘅「月九」檔劇集,就搵咗竹內結子連同江口洋介、妻夫木聰、山下智久等人氣男星合拍《午餐女王》。竹內結子憑《午》劇獲得日劇學院賞最佳女主角,奠定日劇女王地位。

2004年,竹內結子更夥拍木村拓哉主演《冰之驕子》(Pride),平均收視高達25%。同年上畫嘅電影《藉著雨點說愛你》大收47億日元票房,成為年度票房三甲。因為《藉》而與中村獅童相戀結婚兼生仔,期間一度全面停工,直至與中村獅童分居後復出,復出作《那年夏天 我、洋子還有老爸》 為竹內結子贏得多個獎項。

回復單身嘅竹內結子人氣不跌反升,差唔多每年都有主演嘅新劇同電影推出,作品包括再同木村拓哉合作嘅日劇《A Life》、偵探劇《夏洛克小姐》以及電影《信用欺詐師JP》。值得一提係,喺香港取景嘅《信用欺詐師JP》,片中另一演員三浦春馬7月中自殺身亡。