笑到最後|串流電視嘅直路競爭(高明)

串流電視嘅直路競爭
綜合迪士尼及Netflix嘅策略,現時離不開加價、設立廣告層級、減少內容開支。

迪士尼(DIS)公佈業績,串流業務Disney+客戶人數終於超越Netflix(NFLX)成為最大串流平台,截至6月嘅季度業績,播大平台業績顯示,美國本土新增常客只得270萬名,大部份來自Paramount+及難以統計嘅免費試用。數字以外,又反映串流電視又去咗另一個生態階段。

下載Yahoo財經APP

美股、外匯、加密貨幣免費即時報價,自選投資組合獲取相關新聞提示。

Netflix曾經係串流電視嘅霸權股,因為早轉型做串流電視,睇住Netflix長期蝕本做令其他本來靠電視電影或其他方法賺緊錢嘅娛樂事業冇興趣加入一齊燒銀紙。疫情前亞馬遜(AMZN)嘅Prime同GoogleTV等將個電視銀幕變成Device,已經啟發咗唔少企業,而間中Netflix傳出會賣廣告,佢嘅只傳不做亦提供咗一個市場空間畀Roku(ROKU)介入。

疫情後冇得出街更加係所有事情嘅轉捩點,喺屋企冇嘢做,搵娛樂最直接就係呢類串流平台,傳統有線電視都係有節目表,滿足唔到隔離期間長時間喺屋企嘅龐大影視需求,月費任睇變咗最有效。

策略離不開加價

疫情中段,一大批本身有版權嘅製作公司例如迪士尼、HBO、Paramount等等都出串流平台,最初以上客為目的大家鬥打價格戰競爭,Netflix一度失色之餘,亦都失去部份嘅內容。同一時間亦要佩服Netflix管理層多年前自製劇集嘅長遠目光,雖然變咗韓劇頻道有少少意外,但保留自家製嘅內容及生產流程,有牙力同人斟內容版權。當年最初興起嘅時候,Netflix喺流程上由集資、製作、發行一條龍服務,被批評永遠回唔到本,現時發現點都要保留啲生產力,否則群雄並起時,個個版權持有人自己發佈,純第三方平台變得極之被動。

現時已進入人人做嘅後期階段,開始出現退訂潮,訂閱量度機構Antenna 統計,19%嘅Netflix, Hulu, AppleTV+, HBO Max and Disney+用戶喺過去兩年取消三個或以上嘅月費計劃,相對2020年6月6%。又咁講,過去訂閱相對係較小眾,相反,現時人人都有至少一個訂閱影視台,已經成為基本配置。

綜合迪士尼及Netflix嘅策略,現時離不開加價、設立廣告層級、減少內容開支,可以預期,未來各大平台都會搵首加價,打擊分享帳戶以及開始賣廣告

曾經一段長嘅時間,串流平台嘅股價變動主要來自上客嘅增長,賺唔賺錢係其次,未來一段長嘅時間,相信盈利會睇跑出嘅主要關鍵。同大家了解嘅任何市場競爭相若,現時就睇吓群雄並起之下淘汰淨邊個,好似電話市場基本上淘汰剩iOS及Andriod,iPhone及其他;遊戲機得Sony(SONY)、微軟(MSFT)及任天堂(NTDOY);入直路後死餘嘅兩至三個,將會成為餘下霸權股。

股票以外,大家有心理準備,將會加價,並且現有福利會大減。講到尾,霸權股其中一特性,就係客戶有客戶投訴,企業嗰邊唔使理你。

高明

facebook:https://www.facebook.com/bigricetea

IG:https://www.instagram.com/koming.usstocks/

作者簡介︰賺錢係目標,炒股係手段,專欄記載由手段到目標嘅過程。

本欄逢周三刊出