笑到最後|總統唔做財演 美股睇嚟要唞唞(高明)

·3 分鐘文章
總統唔做財演 美股睇嚟要唞唞
拜登唔見得將政績同股價掛鈎,亦冇出文唱好股市。

之前本欄幾次打氣文,成功喺低位都嗌返上嚟,但係今次已經冇咁容易。本欄一路都係睇好美股,但上星期四嘅走勢都反映即使已經跌完,破頂都唔係咁快嘅事。

下載Yahoo財經APP

美股、外匯、加密貨幣免費即時報價,自選投資組合獲取相關新聞提示。

升市=資金+信心。加息未發生,但現時預先反映一年5至8次加息,預先沽定,亦都反映早前市場參與者嘅孖展水平係幾狼死。

但重點係信心。由12月開始,每逢反彈,總有人攔路,1月第一個交易日再一次發生同類事件,1月20日,開市先升2%,收市下跌1.3%,盤後一度跌3%,一來一回5%,連同Netflix(NFLX)好業績差指引大跌兩成。遲買平幾嚿,持貨信心大打折扣。

市況對big techs業績嘅反應,有可能係:

好業績、好指引:股價不變至微升

業績及指引一好一壞:Netflix翻版

兩者俱差:洗倉

拜登未將政績掛鈎股價

面對市場如此睇法,並唔係過去捱一星期至三個月可以捱返嚟,加之每月議息紀錄及三月預計加息,暫時睇鮑威爾及背後朋黨肯定偏向加息派,吹到有咁大得咁大。

重申一次,美股成日都係咁,即使冇大事發生,冇合理原因都可以炸。

但今次有唔同,因為少咗個最有權力嘅財演。所謂一日最衰Donald Trump(當撈.侵)。佢引入Twitter唱美股政策市,但背後大方向係該屆政府支持股價上升,將股價同政績掛鈎,市場大上大落但格局係上,唔升佢都嗌到升。

現屆政府則喺任何一方面都畀唔到信心,成個政府嘅形象受到前總統奧巴馬一句評價「不要低估祖搞亂檔的能力」而定形,亦都行緊呢個軌跡。拜登一唔見得將政績同股價掛鈎(其實唔知佢政績係乜),二冇出文唱好股市。最大影響係市場失去信心時,冇人畀膽。

加息預期鬥大只係吹水大會,大家會見到加兩三次息已經完成今次加息周期,但股市就現正反映緊一年加8次息嘅預期,高明信前者,但市場要因為呢個原因跌都控制唔到。

惟一對抗方法,只有無孖展持貨,係咁多。

高明

facebook:https://www.facebook.com/bigricetea

IG:https://www.instagram.com/koming.usstocks/

作者簡介︰賺錢係目標,炒股係手段,專欄記載由手段到目標嘅過程。

本欄逢周三刊出

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能