等咗22年《男兒當入樽》終於有新作

·1 分鐘文章

  香港好多中佬,都係睇《男兒當入樽》大。 故事交代幾個月嘅事﹐但足以係我呢一代唔少人嘅「熱血補充劑」。 經典場面太多,金句太多,甚至有記者都以為赤木剛憲真有其人, 將「控制籃板就能控制比賽」呢句對白拎嚟引用! 1996年湘北打完山王之後,唔少人嘅青春就停喺嗰一格。 之後作者井上雄彥最多都係喺1997年推出嘅畫集, 畫咗個短篇交代各個成員喺球季後嘅暑假點樣過。 下年東京奧運,集英社就宣布4月會推出《男兒當入樽》新畫集 《PLUS/SLAM DUNK ILLUSTRATIONS 2》, 收錄上一本畫集後所繪製嘅大約130多張作品, 以及11張新畫作,包括封面插圖。 照咁睇,以插圖形式出新作,《男兒當入樽》個故事唔會有幾多發展, 甚至可能只係純粹角色造型。 不過都好想知,如果有劇情的話,時空會係點? 仲係高中嘅湘北五虎,定係已經4張嘢嘅大叔?

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能