米線關注組!北角米線小店 自家熬煮清新健康鯊魚骨湯底

·2 分鐘文章

米線關注組嘅組員成日四圍出動,尋找一碗又一碗酸香辣平衡得宜嘅米線。而湯底可以話係一碗米線嘅靈魂,點樣可以唔落味精但又帶出清甜鮮香,絕對係一種學問。北角有間主打米線嘅小店,上年年底開業,就係靠清新健康嘅湯底贏得附近街坊嘅愛戴,經常都好旺場。

小店細細間,水泥牆身裝潢,走工業風路線,以供應米線為主,而呢度嘅米線更係標榜每碗都係獨立一個一個咁煮,所以等候嘅時間就可能要耐少少,不過慢工出細貨嘛。每碗米線均以海星、螺頭、鯊魚骨等熬成嘅湯底做base,每日最少熬8個鐘,魚香濃郁,啖啖清甜。當然如果慣咗食重口味少少,或者鍾意食辣嘅朋友仔,都可以點選麻酸辣版嘅。辣椒油都係舖頭自家製,以7種天然辣椒加櫻花蝦等製成,香辣而唔油,就連酸菜都係自家製嘅!一碗米線嘅功夫都唔少啊。

牛魔王麻酸辣寬粉

米線方面,官配又得自選組合都得,例如好似有豬大哥麻辣米線、蟲草花花膠雞柳魚湯米線等適合唔同人嘅口味。今日就同大家介紹人氣最高嘅其中兩款——牛魔王麻酸辣寬粉、無油酸菜魚魚湯米線。前者餸料包括有肥牛、牛肚、牛脷等,應爽則爽,應腍則腍,加埋酸香嘅酸菜,配搭唔錯。

無油酸菜魚魚湯米線

至於後者,以黑魚片製作,大大片,肉質軟滑,最緊要係冇骨,食得好方便。而且湯底清甜冇油,同平時食開嘅酸菜魚都幾唔同,呢個絕對可以話係清新版。想要濃味啲嘅就自行加餐廳自家製嘅辣椒油啦。

呢度亦有小食供應,薄片嘅蒜泥白肉蘸滿醬汁同蒜蓉,捲埋一齊食就更惹味;以自家製辣椒油製作嘅涼拌豬耳,爽脆香辣。

自家製辣椒油重可以買走~

VV尾線
地址: 北角七姊妹道34號兆年大廈地下A號舖

文、相:Kar

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能