米芝蓮大廚坐鎮 尖沙咀新開意式餐廳 自家製手工意粉+浮誇系金箔Pizza

意大利菜多數都係由麵粉製作,好似一諗起意大利就會諗起嘅意粉、薄餅、麵包等都係。而喺尖沙咀新開嘅一間意大利菜餐廳,就由曾經連續廿年榮獲米芝蓮名銜嘅星級廚親自坐鎮,佢更特別挑選多款唔同嘅麵粉製作唔同嘅菜式,將正宗傳統意大利人嘅家庭味道帶畀食客。

 經典龍蝦扁意粉
經典龍蝦扁意粉

經典龍蝦扁意粉

先講下意大利粉。餐廳每日新鮮製作意粉,選用屬於00 麵粉嘅Petra 7220麵粉,呢隻粉吸水力高,而且帶有小麥香。推介試下經典龍蝦扁意粉,以橄欖油同番茄煮好醬汁後,再放入新鮮龍蝦一齊炒,最後加入自家手作扁意粉。意粉掛汁力高,吸晒啲龍蝦汁,口感煙韌,啖啖濃香。

 金芝肉醃薄餅
金芝肉醃薄餅

金芝肉醃薄餅

而Pizza則選用咗另一隻麵粉——由意大利入口嘅Petra 3石磨麵粉。呢隻係一隻專門用嚟做pizza嘅麵粉,做出嚟嘅麵糰穩定性高,麵筋有彈性。星級意籍大廚堅持喺店內自家培植酸麵種,將Petra 3石磨麵粉,加埋水、蘋果皮、蜜糖同砂糖等嚟起種,成熟到變成天然酵母之後,就將酸麵種混入Petra 3石磨麵粉,搓成酸麵糰發酵24-48個鐘,再拎去焗。就咁聽都覺得會唔會太多功夫啊師傅?不過為咗真‧地道嘅口感,心機總不可少。餐廳供應多款pizza,講到最吸睛嘅就一定係金芝肉醃薄餅,中間個金色波波勁sharp醒,原來係以金箔舖滿晒喺Burrata芝士面呀,配埋鹹鹹香香嘅醃三文魚肉,餅底口感柔韌。

海鮮薄片墨汁燉飯
海鮮薄片墨汁燉飯

海鮮薄片墨汁燉飯

餐廳亦有一系列創作菜式,黑麻麻嘅海鮮薄片墨汁燉飯就係其中之一。特意選用嚟自意大利北部、風乾熟成一年嘅Acquarello米,呢種米非常有咬口,吸水力又夠高,煮出嚟嘅意大利燉飯都會香濃啲。大廚先喺鍋上將米烘熱,再加入白酒、魚湯同新鮮墨汁煮香,唔使加牛油同忌廉,risotto都可以好creamy。加埋多款插面嘅海鮮,係幾吸引嘅,但味道就略為鹹咗少少喇。

 經典肉丸配蕃茄醬
經典肉丸配蕃茄醬

經典肉丸配蕃茄醬依然大廚家鄉做法製作,肉丸腍身,醬汁蕃茄味濃郁。

千層Tiramisu杯
千層Tiramisu杯

甜品嘅話,點少得經典嘅Tiramisu?呢個千層Tiramisu杯,香甜軟滑,咖啡香味突出。

秘製漬香吞拿魚牛角包
秘製漬香吞拿魚牛角包

秘製漬香吞拿魚牛角包

順帶一提,餐廳門口有個Grab & Go counter,供應多款自家製烘焙美食,包括外層鬆脆、層次分明嘅經典自家製牛角包,同秘製漬香吞拿魚牛角包等。

Da Filippo Trattoria
Da Filippo Trattoria

Da Filippo Trattoria
地址:尖沙咀廣東道21號海港城港威商場3樓3203-3204A號舖