紅館補場啟動 保密嘉賓名單 騙徒借姜濤谷黃牛 張敬軒親身出征打假

騙徒手法層出不窮,竟斗膽「入侵」張敬軒的紅館主場,在網上出Post訛稱姜濤將首度擔任軒仔個唱嘉賓,更重點力推「毋須排隊,已有現票在手」呃Fans落疊,軒仔、姜濤及主辦方英皇夾擊打假,令騙徒知衰速「收檔」!

張敬軒16場紅館《張敬軒THE NEXT 20演唱會》前晚重啟,有騙徒瞄準人氣男團MIRROR的紅館演唱會出現近44萬元的「癲價」門票,昨日肆無忌憚借軒仔個唱在社交網大肆宣揚,指MIRROR「人氣王」姜濤將擔任5月14日軒仔歌迷會專場的嘉賓,更言之鑿鑿以「姜濤會是首次同軒仔公開合作合唱,不要錯過,4X段、2X行、$680飛單人位」作招徠,又聲稱「第二日仲係休息日,軒仔一定會Encore同唔使留力,會唱特別多歌,同氣氛特別正,2X行,最近軒仔演唱會中坐飛船繞場環節,已排隊幾個鐘,換好新飛!唔使自己到時換飛,現票在手」。

由於疑似「黃牛飛」在網上瘋傳,軒仔為免騙徒得逞,「正義俠」上身跟騙徒迎頭碰擊,在該Post留言:「你嘅消息來源唔正確,多謝支持。」姜濤亦隨即在社交網指消息是「FAKE(虛假)」,並上載人頭湧湧等入紅館睇軒仔個唱的盛況,表示:「但祝前輩演唱會一切順利」,軒仔轉載並回覆:「多謝姜,你都要勞逸結合,工作繁忙都要注意休息。」

軒仔所屬的英皇娛樂演唱會部總監馮貽柏亦開腔打假,呼籲歌迷切勿受騙:「外間流傳的嘉賓名單,當中存在很多幻想及虛構,相信聰明觀眾不會相信這些流傳消息。每晚嘉賓,當晚到場才會公布,留予大家驚喜。」3方合力嚴打下,該「假Post」已極速被刪除!

收紙紮鐘贈興

軒仔今次「補場」全因其跨年騷最後8場在疫情下無奈煞停,由於入座率限一半,為免不退票的歌迷失望,故唱Double由8場變為16場。個唱順利重啟,軒仔向支持者鞠躬致謝說:「歡迎大家返嚟第11場,之前諗住做5場休2日,好開心啦!點知今次做10場休咗4個月呀!」雖然入座率限5成,但他感覺如「Full House」,又百感交集說:「休息嘅4個月中發生唔少事,可以再坐番喺呢度,要懷住好感恩嘅心去努力唱好每首歌,決定呢16場演唱會,每場都當尾場咁做,唔係講笑。」全場觀眾報以歡呼聲及掌聲。

期間,軒仔發現有歌迷高舉閃令令的紙紮牌,即踢爆對方每次都創作配合紅磡主題的燈牌贈他,又問:「中間識閃嗰舊黃色係咩?鐘?你送個鐘畀我?紙紮鐘?你真係好嘢!仲要剛好12個字係我扮MIRROR個樣!」看似「大吉利是」,但勝在軒仔鍾意,更特別回贈私人家屬票:「送2張尾場山頂位畀你!」又叮囑工作人員將它燒掉:「紙紮禮物一年收一次就夠,百無禁忌!」不少歌迷起哄大叫:「我又要禮物。」而捧場嘉賓則有泳兒、吳浩康、艾妮及高層楊政龍、許佩斯等。

為免歌迷受騙,姜濤大大隻字「FAKE」澄清是「流料」!
為免歌迷受騙,姜濤大大隻字「FAKE」澄清是「流料」!
歌迷以軒仔的樣子製成「紙紮鐘」,出名玩得的軒仔未有介意,更送飛作回禮。
歌迷以軒仔的樣子製成「紙紮鐘」,出名玩得的軒仔未有介意,更送飛作回禮。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能