4大素食咖啡店推薦 特色照燒汁淮山扒大啡菇堡、自家製手工素餃子

愈嚟愈多人追求健康飲食，香港而家都多咗好多素食選擇啦，除咗餐廳仲有唔少素食咖啡店，等大家可以喺一個舒服嘅環境下享用素食。今次介紹4間素食cafe畀大家，有西日純素、禪系素食、綠洲主題、使用有機及公平貿易食材嘅純素咖啡店，健康之餘又可以打下卡～

西日純素cafe V.W Vegan Cafe

大埔區少有嘅純素餐廳，呢間cafe係家庭式經營，主要供應多款日式同西式純素菜式，菜單上嘅選擇好多元化同令人驚喜。好似呢個不可能漢堡咁，食完真係覺得佢「不可能」唔係真肉嘅漢堡呀，口感同味道都好相似，難怪係招牌菜。另外日式便當都好受歡迎，菜單每日唔同，款款都好有心思。仲有自家製作嘅手工餃子，有新豬肉芝士、新豬肉椰菜同新豬肉韭菜三款口味，水餃皮薄同時又煙韌。

禪系素食 一禪

一間好有日式禪系風格嘅咖啡店，有日式塌塌米茶座同私隱小空間，供應咖啡及鹹甜點～鹹點方面照燒汁淮山扒大啡菇堡配蕃薯條同羽衣甘藍意大利青瓜意粉都好有人氣，前者用大啡菇取替麵包，一入口超juicy！中間嘅淮山扒質地粉粉地，配埋照燒汁意外嘅好食；後者用意大利青瓜取代意粉，一啲青瓜嘅草青味都無，醬料由羽衣甘藍同榛子製成，清爽得嚟食到奶油般嘅幼滑口感。伯爵茶香莓蛋糕都好受歡迎，茶味香濃帶些微酸甜。

綠洲主題咖啡店 OVO Cafe x 大飯糖

CAFE選址喺前三級歷史建築物灣仔街市，經活化之後擺滿鮮花同植物，環境舒服寧靜，主打新派素食料理，最近更同大飯糖合作推出中西合璧嘅甜品。大部分人都會叫佢嘅dinner set，包前菜+主菜+小食+甜品，素肉醬意粉幾唔錯，選用純素芝士，味道濃郁而唔油膩，比起一般肉醬清爽。另外黑松露野菌燉飯都好香濃呀～

公平貿易純素咖啡店 順逆珈琲酒館 Cafe

使用有機同公平貿易食材嘅純素咖啡店，店面環境用上木質設計，加上柔和燈光，非常舒適。蘑菇鹹Pancake係招牌菜，Pancake質感軟身鬆化，配埋素肉鬆原來咁夾，令人有回頭再食嘅衝動！黑松露意粉香氣好突出，清爽健康又好食。甜點方面有機香蕉朱古力熱香餅配梛子忌廉同埋海鹽杏仁醬配素鮮油快樂貝果包都值得一試。

文: Yanica