一直以來娛樂圈都有唔少混血女星，憑着相對特別嘅外型，容易令觀眾或聽眾有更深刻印象。混血女星由甄妮、柏安妮、李嘉欣嘅上幾代代表之後，新一代又有邊啲混血女星？

人生比星途更加戲劇嘅梁洛施，佢嘅父親本身係澳門嘅葡萄牙籍名門望族。但梁洛施出世不久父親就離世了，直至14歲梁洛施母親才告知父親離世的事實。梁洛施由年少無知，及後差點一登豪門。原先甚有演藝天分嘅佢，而家係唔憂「撈」？定係冇得「撈」呢 ？

傅嘉莉啱啱喺旅遊節目《識玩旅行團》入面大玩水上遊戲，仲不時大矖美好身段！傅嘉莉得天獨厚嘅身段會唔會同佢太公係德國人有關？而且仲有八份一德國血統嘅傅嘉莉喺節目著三點式泳衣亦絕對冇拖拖拉拉！仲將年輕近十年嘅江嘉敏比下去！

香港人比較熟悉盧靖姍嘅作品有《戰狼2》、《家有喜事2009》。另外佢亦拍過美劇《綠箭俠》。盧靖姍嘅父親亦係一位美籍演員。除咗演戲之外，盧靖姍亦出過唱片。香港同美國都有佢嘅足跡，如果佢自我宣傳更好的話，會唔會成為另一個Maggie Q？

盧慧敏大家就可能陌生少少，只有26歲嘅佢現時就主力喺ViuTV發展。佢嘅背景亦比較特別，佢媽媽祖籍哥斯達黎加，可以話世界上三大語文中文、英文、西班牙文佢都識！真係發展潛力巨大。

阮兒2006年參選港姐落敗之後加入TVB。不過發展平平。但憑着《愛．回家》入面飾演Pinky之後開始進入觀眾視線範圍。早前更憑《金宵大廈》中飾演舞女莎莎，與芳芳（尹詩沛飾）大玩SheShe，成功引起觀眾注意。而籍住爸爸係越南人嘅身份，開拓近年發展蓬勃嘅越南旅遊節目，會唔會又係另一條血路？而且細細個喺荷蘭長大嘅阮兒，仲識得講荷蘭話㗎！

吳千語嘅爸爸係中國、澳洲、法國混血。大家對吳千語嘅作品熟悉程度可能都唔及佢同林峯嘅一段感情。不過對於「愛人結婚了，新娘不是我」嘅吳千語，如果大家想開始認識佢嘅作品的話，嚟緊聖誕檔期嘅《葉問4》就可以開始留意吓啦！

李詩穎呢個名可能大家冇咩印象，父親係內地演員李崇霄，母親則是德國籍。藉住Angelababy師妹稱號開始為人留意。雖然暫時只參與過綜藝節目，但睇嚟佢嘅發展方向都會以Angelababy為藍本，大家又點睇呢？