【細So偷食】天王巨星到二打六 背妻偷食男藝人逐個數 有人係慣犯!

·4 分鐘文章

娛圈又有男士被爆偷食!除咗前DJ細So(蘇耀宗),佢地都做咗「天下男人都會犯嘅錯」,仲有人一錯再錯。貪一時快樂,後果係咪一定好嚴重?咦,好幾位嘅另一半都選擇原諒喎!

許志安

轟動一時嘅「安心事件」發生喺去年4月,有傳媒得到一條的士車廂閉路電視片段,拍到許志安、黃心穎與圈外男友人一同上的士,「安」「心」二人待友人落車後,有默契地著司機將車駛到鯉魚門黃心穎香閨樓下。許志安與黃心穎喺車上熱吻兼十指緊扣,表現親暱。

片段曝光後,許志安即晚召開記者會道歉,表示「做咗一件不可以原諒的事」,對唔住太太鄭秀文,更形容自己「冇咗靈魂、係一個壞咗嘅人」。女主角黃心穎翌日在IG貼文認錯,之後一直「潛水」,更逃到美國暫避8個月。

兩人形象插水,工作立即被叫停,許志安原定的演唱會取消,黃心穎多套主演劇集就延期播放。

而Sammi喺事件曝光後2日發帖文,表態「不放棄對方」。許志安在亦曾表示已獲太太原諒,並在今年6月現身Viu TV 音樂節目《Chill Club》,為復出試水溫。

黎振燁

「安心事件」一周年未耐,港男出身嘅TVB藝員黎振燁,被發現背住臨盤在即嘅老婆,同一齊拍劇嘅對手朱智賢喺車廂幽會。黎振燁揸車載住朱智賢去到荒山野嶺切生日蛋糕,見到傳媒慌忙走避。

事後TVB幫朱智賢開記招等佢公開認錯,而黎振燁就無咁好待遇,直到有傳媒追訪先有機會表達歉意,黎太亦開腔表明乃念多年感情同小朋友就快出世,已經原諒老公。

李潤庭

由新聞主播轉做主持嘅李潤庭,多得TVB高層余詠珊帶挈,過檔後就有份主持《東張西望》,機會不絕。但係李潤庭2016年被踢爆趁空姐老婆出埠期間,偷食已婚女子Tiffany。正如上面兩單同類事件,TVB就梗係安排咗李潤庭開記招認錯,兼且雪藏一排避風頭。點知事隔一年左右,復工無耐嘅李潤庭又被拍到同Tiffany喺劏房幽會。一錯再錯冇得抵賴,TVB決定怒炒,李潤庭一度返加拿大避風頭。

戴志偉

曾經係TVB綠葉嘅戴志偉,早年轉投保險業,今年初被指同嫩口女同事Candy有來往,而Candy又被踢爆另有男友,而且私生活混亂,搞出四角關係。戴志偉一度發火鬧傳媒,之後解釋同Candy係朋友。最近戴志偉似乎已經同太太嘅關係回復正常。

彭順

導演彭順2014年被揭發拖住靚模李悅彤行街,一如熱戀情侶,當太太李心潔無到!事後彭順夫婦二人發聲明,心潔表示已原諒老公。

倪震

同「永遠的女神」周慧敏拍拖多年,倪震2008年被拍到喺酒吧激吻來港就讀嘅內地女大學生張茆。事後倪震道歉都盡顯才子本色,對事件發聲明時以「引疚分手」表達分開,接受專訪又形容自己「以一個成年男人發揮魅力,在夜場孔雀開屏」。

分手消息言猶在耳,不足2星期後倪震突然出聲明,表示已經同周慧敏註冊結婚,相當峰迴路轉。

成龍

1999年,成龍同亞姐出身嘅吳綺莉,甚至有傳吳已經懷有「龍種」。成龍召開記者會,面帶笑容兼大擺勝利手勢,承認「做錯咗全世界好多男人都會做錯嘅嘢」,又形容外遇係「一時貪玩」,「如果個細路仔係我,我一定會負責」,形象大插水。多年後成龍於自傳憶述,「小龍女」事件犯嘅錯太大,事後一度諗過同老婆林鳳嬌離婚,但林鳳嬌對成龍講「你需要我同個仔,我地可以馬上企出來」,令成龍好惑動,仲話將遺產全數留俾老婆。

相關文章

【細So偷食】細So偷食惹性病 連累老婆驗身 阿B真身原來叫Macy

【細So偷食】小三驚爆懷有細so骨肉 Macy默認墮胎

【細So偷食】「商台韋小寶」感情網絡好複雜 秘戀葉佩雯 先後娶「阿Wing」

【細So偷食】女生必學!男友老公偷食 女明星教你點處理 周揚青爆料毀滅小豬

【細So偷食】天王巨星到二打六 背妻偷食男藝人逐個數 有人係慣犯!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能