經吳剛買3萬幾蚊Eason演唱會門票未獲退款 等逾半年受害人報警求助

·2 分鐘文章
吳剛(Big Big Channel 截圖)
吳剛(Big Big Channel 截圖)

當年喺《歡樂滿東華》赤膊搽油、食炭及飲滾油嘅吳剛師傅,好似超人咁能人所不能。不過去到90年代尾佢決定淡出娛圈做生意,都已經好少喺報章雜誌見到佢嘅蹤影,只係知道佢轉型做飲食生意及擔任酒樓集團宴會部總監。不過今日佢嘅名字又突然重現於報章上。有人控告佢拖欠3萬多元嘅陳奕迅演唱會門票錢未退還,仲一拖再拖,搞到要報警求助。

事緣係一名孫先生指去年曾向吳剛訂購一批七折餅卡同34張《陳奕迅Fear and Dreams香港演唱會19/20》門票,而每張門票980元,即合共33320港元,全部已付錢。雖然去年已經交收咗啲餅卡,但係後來陳奕迅嘅25場演唱會受社會運動影響取消,主辦單位其後亦已經陸續喺今年4月底前完成全部退款,不過可惜係孫先生去到而家都仍然未收到吳剛嘅退款。孫先生仲話吳剛曾經講過12月退錢,之後又有個女人自稱吳太嘅人話退,再話喺大馬未返香港,一拖再拖。

喺4月時吳剛就話自己病咗喺深圳醫院留醫,所以要遲啲先過到數,話會俾多5千蚊當做利息,最後當然又係冇退到錢。去到7月,孫先生就搵吳太話佢再唔退錢就會去報警,於是佢都間唔中覆下,之後仲退出群組。而吳剛就7月中發短訊向孫先生道歉,兼話自己身體不適正在治療。

由於現時孫先生仍然都未收到退款,而得到嘅回應亦全部都係「拖字訣」,最後唯有去到警署備案。

陳奕迅
陳奕迅