雅虎香港新聞 「網上好多消息不可信」 洪金寶暗撐老友阿倫
【星島日報報道】鄭保瑞執導《九龍城寨．圍城》昨日舉行開鏡儀式，洪金寶與古天樂再度合作，笑指古仔進步變成老手，又搞笑指今次有打戲，但現在說話都吃力。對於譚詠麟被爆在內地「食粉絲」，洪金寶直言近期甚少聯絡，並指網上好多不可信。文：鄺芷瑩 圖：羅安強
古天樂（古仔）、洪金寶、任賢齊、林峯、劉俊謙及黃德斌等昨出席新戲開鏡儀式。古仔笑言在戲中會打得甘，並跟林峯有較多對手戲，而這部電影以男演員為主、陽剛味較重，所有參演的演員都好辛苦，因為用了一年時間去練打，大家都會親身上陣演出，除非好高難度動作或有危險性才會用替身。他說：「我戲裏啲動作好似旋風咁快，但OK啦！因為都有少少武打經驗。」對於劇組重新搭建整個九龍城寨布景，古仔笑言每日置身拍攝現場都好開心，因為擺放了好多80年代的雜誌，能夠睇返覺得好懷舊。
直認被錢打動
洪金寶與古仔在電影《殺破狼•貪狼》後，今次兩人再度合作，洪金寶笑指古仔進步不少，現在已變成老手，不過今次自己都有些武打戲。問到拍打戲會否吃力？他搞笑謂現在跟大家說話都吃力。問到導演何以打動他演出？他笑說：「俾錢就打動到我啦！」提到最近有指譚詠麟搭上內地粉絲，問到可有聯絡？洪金寶說：「呢排少啲，我啱啱由上海返嚟5日。（可會相信阿倫搭上粉絲？）我唔知啦！好多嘢唔信得㗎！網上好多人又話我49年出世、又話我前妻點樣？拎第二個女人張相話係我前妻，咁你話信唔信呀？又話洪金寶老、成龍好老，講嗰個人唔會老！係呀！因為佢會好快『釘』。」
林峯每日都受傷
首次跟林峯合作的任賢齊大讚對方努力，為了今次演出而不停操練，一星期操練5日，所以好期待對方的打戲。他說：「平時見感覺佢風流倜儻、好瀟灑，今次見佢身形鋼條咁好實淨。」林峯則笑謂在戲中不刻意騷肌，戲中會被小齊及古天樂輪流打，但亦覺得今次演出好大挑戰。他說：「基本上每個角色都有機會打我，因為我貫穿成部戲，所以由頭打到尾，今次有拳腳打、撞車、跳樓，總之就飛天遁地。」問到可有練到受傷？他坦言少不免，每日都會揩花，但仍覺值得，而開拍前接受訓練了個幾月，惟未試過高能量訓練。他說：「每一日練3個鐘，第一日我仲練到差啲嘔。（有冇買保險？）少少，但辛苦都值得。」林峯透露該片的角色造型很鮮明，為免髮型曝光，故昨天戴上帽子，而且為配合角色亦專登曬黑。
與囡囡日日視頻
該片將拍攝至農曆新年，問林峯豈不是未能跟太太張馨月和女兒「格格寶」見面？小齊坦言這些就是演員的付出，而林峯亦很認同。林峯說：「依家每日視頻，個女一歲幾，我又掛住老婆又掛住小朋友。（個女會唔會唔認得你？）唔會，一見到我就叫爸爸， 到幾辛苦都冇無所謂。（太太和女兒會否來港？）始終疫情關係要隔離，搭飛機都有風險，但唔緊要，努力工作先啦！」
■洪金寶大讚古仔的動作戲有進步。
■洪金寶以婉轉方式暗示阿倫食粉絲傳聞不可信。（資料圖片）
■林建岳亦有出席開鏡儀式。
■全男班上陣，難怪電影陽剛味十足。
■劇組重新搭建九龍城寨場景進行拍攝。
■小齊大讚林峯努力操練。
■小齊與林峯為工作而未能陪伴家人。
娛樂
