網上熱話|港澳齊谷生仔 澳門政府廣告被批無說服力 網民:講到生瘡咁易(有片)

短片由澳門社會工作局推出,題為「生兒育女 倍添幸福」(澳門特區政府社會工作局FB)
短片由澳門社會工作局推出,題為「生兒育女 倍添幸福」(澳門特區政府社會工作局FB)

香港生育率連年下跌,位於全球倒數第一水平,政府連番出招谷生育成效似乎不大。至於一海之隔的澳門,出生率亦持續下降,最近官方拍了一條宣傳片鼓勵市民生育,但留言的澳門網民並不受落,更紛紛嘲諷「一啲說服力都無喎」、「講到生仔好似生瘡咁容易」。

澳門統計局資料顯示,去年新生嬰兒3,712名,按年減少632名,出生率下跌至千分之五點五,再創近二十年新低。短片由澳門社會工作局於上周四(13日)推出,題為「生兒育女 倍添幸福」,至今錄得25萬次點擊、過千人給反應,還有近千個回應。48秒片段中,一對父母與一對年幼子女在海邊休憩,女兒在吃蛋糕,這時候一對情侶走近打招呼,男方讚賞孩子可愛,女方此時向男方表示「其實我哋都可以生返個吖」,及後打出「生兒育女 倍添幸福」字樣。

「一日唔搞掂住屋 叫人點生」

由於宣傳手法平淡,引發網民批評,亦投訴生活逼人是不生的原因,「可唔可以有啲劇情,有啲內容?你話返工好有壓力,放工返去見到自己啲小朋友,感到溫暖都好啲,你而家咁即係因為小朋友可愛就要生?一啲說服力都無喎,想問下點解主管可以批到出街?」、「點解咁都拍得出?可愛就要生?政府嘅政策根本就打擊生育。產假得70日,侍產假得5日。媽咪未休息夠就要番工,BB 3個月都未夠,就要交比人照顧。每日係公司嘅時間長達10小時 (仲未計OT),工人又請唔到,難道政府覺得小朋友光合作用就識大?」、「影片冇重點,剩係強調好得意就去生,完全係不負責任」、「政府一日唔搞掂住屋,就業,教育,你叫人點生」、「消費券都好得意,不如你們都派下」,亦有多人展示家中寵物照片,稱寧願養貓養狗都不想生仔。

原文刊登於 AM730 https://www.am730.com.hk/本地/網上熱話-港澳齊谷生仔-澳門政府廣告被批無說服力-網民-講到生瘡咁易-有片-/463269?utm_source=yahoorss&utm_medium=referral