網上票選最喜愛30歲以下嘅無綫女藝人 暫時邊位係第一?

近年無綫有唔少一線小生花旦都唔續約,選擇離巢向外闖,令到可以擔大旗嘅演員越嚟越少。大家以為無綫會有青黃不接嘅問題,但其實無綫已經打造緊新一批演員接捧,唔少二、三線嘅演員愈嚟愈多演出嘅機會,仲開始慢慢入屋,受觀眾及網民喜愛。近日有討論區搞咗個選舉係投票最喜愛30歲以下嘅無綫女藝人,今日就同大家睇下暫時頭十強係邊幾位啦!

鄧佩儀
鄧佩儀

第十位:鄧佩儀(26歲)

2013年華姐冠軍鄧佩儀(Gloria),入行7年嘅佢產量唔多,第一套劇集係2014年嘅《點金勝手》,喺劇中飾演黃宗澤個妹卓至然Ginnie,不過可惜被網民大彈演技生硬。之後佢嘅演出機會唔多,一直未有令佢成功彈出嘅劇集。直到2016年嘅《幕後玩家》,Gloria為劇集以清爽短髮造型演出,喺劇中與張繼聰飾演一對歡喜冤家,劇集出街後唔少網民都認為佢演技有進步。上年嘅《再創世紀》飾演朱小慧,與周柏豪同埋袁偉豪組成「三劍俠」及今年嘅《鐵探》飾演「臥底」鄺泳莎,與惠英紅及姜皓文有唔少對手戲,演技備受好評,成功洗底。其實Gloria仲有3都劇集未出街(《金宵大廈》、《機場特警》及《降魔的2.0》)㗎,鍾意佢嘅朋友記得留意啦!

蔡思貝
蔡思貝

第九位:蔡思貝(28)

2013年港姐亞軍蔡思貝,自14年開始拍劇就受無綫力捧,不過過往大多都係做啲「衝動性格」嘅角色,例如《衝線》嘅Moon及《鐵馬戰車》嘅貝心柔,可惜佢演技生硬、勁多懶音,加上講對白嘅聲音吵耳,劣評如潮。喺2017年,蔡思貝憑《踩過界》中飾演「癲姐」趙正妹一角,另觀眾對佢改觀,及奪得《最受歡迎電視女角色》。喺今年嘅《大帥哥》,蔡思貝飾演冷靜又細心嘅革命黨章沅婉兼大帥哥嘅妻子,無論係演技、語氣、聲線和速度,唔少網民睇得出佢落咗唔少苦功,成功洗底。

林泳淘
林泳淘

第八位:林泳淘(27)

2012年落選港姐林泳淘,不過由於樣靚身材好,無綫都俾唔少機會佢,好似與陳潔玲拍攝旅遊節目《情迷越南》、喺《3日2夜》著比堅尼介紹溫泉及主持《東張西望》等等,尤其喺《東張西望》報導城中熱話嘅時候,唔少網民成日都放錯重點,經常將焦點放喺佢嘅衣著同身材上面。其實林泳淘亦有唔少拍劇經驗,不過都係以閒角及配角為主,例如《潮流教主》、《老表,畢業喇!》、《BB來了》及《大帥哥》等等。

簡淑兒
簡淑兒

第七位:簡淑兒(29)

簡淑兒喺2012年參與香港小姐競選,可惜落敗。之後加入無綫做娛樂新聞主播,後來先漸漸為人熟悉,15年成為女子組合「少女標本」成員之一。除咗為《3日2夜》擔任主持之外,簡淑兒都有參與拍攝劇集工作,更因處境劇《愛·回家之八時入席》中飾演Elsa一角,而成為新一代宅男女神。喺下星期首播嘅劇集《好日子》都會有簡淑兒嘅演出,佢將會喺劇中飾演性格爽直嘅村長女兒,大家拭目以待喇!

劉佩玥
劉佩玥

第六位:劉佩玥(29)

2013年港姐季軍劉佩玥(Moon),憑甜美笑容俘虜唔少網民心。入行初頭主要擔任主持工作,去到15年先有機會開始拍劇,第一套劇就係《四個女仔三個Bar》,雖然唔似陳凱琳同埋蔡思貝咁幸運跳級做女一,但都算係備受力捧。之後阿Moon嘅戲份越嚟越重,例如《城寨英雄》嘅柯德莉、《幕後玩家》嘅「小三」Emma及《降魔的》嘅啤啤,都令觀眾留下深刻印象,仲話佢比同期上位女星順眼。

鄺潔楹
鄺潔楹

第五位:鄺潔楹(26)

「仙氣女神」鄺潔楹(Judy)喺美國完成大學學位後,隨即返香港加入模特兒公司。2016年開始加入無綫,主要擔任娛樂新聞台主播,喺處境劇《愛·回家之開心速遞》飾演校園女神Venus及拍攝《3日2夜》,深得網民愛戴,上年年頭更加入《學是學非》做新一代「是非精」。不過人紅自然工作多,Judy更因為日夜顛倒嘅關係,搞到賀爾蒙出事,經期亂哂,所以喺上月尾佢已經離開娛樂新聞台,Judy就希望嚟緊可以專心喺電視劇嘅工作,相信大家都會支持佢嘅決定。

馮盈盈
馮盈盈

第四位:馮盈盈(25)

2016年奪得港姐冠軍嘅馮盈盈,當然可以順利加入無綫做親生女。受無綫力棒嘅盈盈,最令人印象深刻嘅一定係同麥明詩及陸浩明一齊主持《後生仔傾吓偈》,期間經常語出驚人,唔少網民都大讚佢夠貼地同真性情。 另外,佢亦為唔少大騷擔任司儀工作及開始參與拍劇,例如《果欄中的江湖大嫂》、熱播中嘅《白色強人》、未出街嘅《解決師》及《極道怪咖》。

張曦雯
張曦雯

第三位:張曦雯 (29)

12年華姐冠軍張㬢雯(Kelly)有樣有身材又有氣質。喺加入無綫後,因為操得一口流利英語而委任《港生活·港享受》及《東張西望》時段內《Pearl Tonight》主持,開始為人認識。之後,Kelly更主持旅遊節目《3日2夜》,喺節目中盡展噴血身材。除咗主持節目之外,Kelly喺2016年開始拍劇,首次拍劇就係喺《律政強人》飾演事務律師,唔少人都大讚佢演技自然及咬字清晰。上年拍攝劇集《跳躍生命線》雖然冇大賣演技,但令人睇得舒服。而熱播中嘅《白色強人》,Kelly就飾演駐院醫生,同時亦係院長親生女。Kelly係唔少男士心目中嘅女神,除咗樣靚身材好之外,就係好鍾意打機,佢曾經試過帶住大眼鏡,以家居look喺網上開台直播自己打機,期間表情多多同埋試過緊張得滯忍唔住爆粗。

劉穎鏇
劉穎鏇

第二位:劉穎鏇(22)

只有22歲嘅劉穎鏇(Tiffany),係2016年奪得港姐亞軍後加入無綫。之後佢就加入《學是學非》做主持,成為「是非精」,當時已經有唔少網民大讚佢人靚聲甜同膚色健康,成為宅男女神。喺上年嘅台慶劇《兄弟》飾演女拳手Zero,當中有唔少打鬥戲,大受網民好評。喺上年年尾,Tiffany宣布繼續修讀學士學位,唔少網民都擔心佢會返美國讀書,好彩佢話係喺網上完成學士學位,同時繼續佢嘅演藝工作。

陳瀅
陳瀅

第一位:陳瀅(29)

模特兒出身嘅陳瀅(Jeannie),喺2014年無綫劇集《女人俱樂部》中飾演容丹丹,開始為人熟悉。身為「宅男女神」嘅Jeannie,因外貌甜美加上演技不俗,係無綫近年力捧上位小花之一,平均一年都有兩套劇集出街,戲份仲一啲都唔少。除咗容丹丹之外,《四個女仔三個BAR》嘅Brittany、《平安谷之詭谷傳說》嘅邱青蘭及《福爾摩師奶》嘅魏素嘉,都令觀眾留下深刻印象。喺今年年頭,陳瀅仲做孝順孫女,以數百萬港幣喺加拿大買獨立屋俾婆婆,真係好有孝心。陳瀅平時仲經常喺社交網站上載自己嘅生活點滴,有時更會做唔同類型嘅運動。動靜皆宜,難怪成為新一代女神啦!

陳瀅
陳瀅
陳瀅
陳瀅
陳瀅
陳瀅
陳瀅
陳瀅