網友開post問︰點面對拍過三級片嘅外母？

每個人都有過去，尤其是長輩。假如你知道佢地後生時嘅勁爆經歷……都真係唔知講咩好。   連登討論區有位巴打，講咗呢個唔知真定假嘅故仔︰巴打話佢同太太結婚2年，外母大約50歲，已經離婚多年。佢聽過啲八卦親戚講，外母以前拍過三……級……片。   於是佢走去搵呢套片，又真係俾佢搵到，仲一眼就認出其中一場「肉搏」戲嘅女角，就係外母大人。佢仲大讚外母後生時身材好好，拍得住周秀娜。   可能因為佢成日loop返嗰場戲睇，外母大人覺得女婿有啲唔同，於是有一晚屋企得佢同外母2個嗰陣，外母同佢講返當年嘅事。嗰套戲成廿幾年前，當時嘅外母仲係一個發明星夢嘅青春少艾。有導演搵佢拍套「愛情懸疑片」，話要為藝術犧牲，要同男主角方中信有親熱戲，當時外母不虞有詐，就簽咗片約。

點知到現場先知，嗰場戲係無厘頭為露而露嘅床戲，仲要男主角由方中信變成曹查理……外母冇人冇物，只好喊住咁拍。更慘嘅係，套戲上畫之後，外母俾人笑係淫婦，一直抬唔起頭做人。   事隔多年，外母仲係好委屈，邊講邊喊，女婿巴打只好由得佢喊晒出嚟。   好多人睇到呢度都覺得係作故仔，認為之後嘅情節就係……唔。而出post巴打唔知係咪太後知後覺，驚件事揚咗家變都似，就叫大家唔好推post。   其實邊個後生冇試過俾人搵笨？Auntie，贈你子華神六字金句︰請你好好放低。原post傳送門