網民票選娛圈現役十大女神 視后新人均上榜 有女星被指素顏靚過化妝？

早前有網民發起票選80、90年代女神，邱淑貞、周慧敏等女星均上榜；近日又有網民評選出10位「娛樂圈現役女神」，既有視后級人馬，亦有加入娛樂圈無耐嘅新人，唔知當中又有冇你支持嘅女星？一齊睇下名單啦！

【第10位】kayan9896（吳家忻）
kayan9896由廣告模特兒出道，基於外表激似周子瑜，身材苗條，獲得多個廣告商垂青，後來參演《試當真》短片《唔通佢有男朋友》及與MC $oHo和KidNey合唱《係咁先啦》而爆紅，更加出埋solo歌曲《Be around》，而佢亦與《試當真》成員Locker喺上年9月公開認愛，宜家仲成日以情侶檔接拍廣告。

【第9位】倪晨曦
倪晨曦集模特兒、瑜伽導師、KOL身份於一身，除咗拍攝日常同化妝教學YouTube片，倪晨曦亦喺2019年投資開瑜伽中心，生意漸上軌道諗住擴充開分店，但就因為疫情被迫暫停計劃。育有一子嘅倪晨曦生完之後，火速回復Fit爆身材，不過早前分享出席時裝活動嘅宣傳照，其露腰短裙造型就被網民批評「腰長腳短」。

【第8位】鍾嘉欣
37歲並育有1女1子嘅鍾嘉欣一向保養得宜，仲試過喺IG分享自己重穿2004年參選國際華裔小姐競選才藝表演環節嘅紅色背心與白色短褲，被網民大讚無論係外貌定身材都同當年有得比；鍾嘉欣人氣亦相當厲害，即使今年失落《萬千星輝頒獎典禮》「最佳女主角」寶座，但網民紛紛為鍾嘉欣抱不平，可以話係「民間視后」。

【第7位】Candy（王家晴）
Candy現時為女團Collar成員之一，參選《全民造星IV》時演唱《紅綠燈》一曲被指災難，更被花姐指佢係憑外貌入圍比賽；不過比賽過程中，Candy一直進步，令人刮目相看。

【第6位】陳瀅
陳瀅出道初期曾因身型壯碩而被網民抨擊，後來積極減肥成功後，成日都喺IG大曬姣好身材，其中一張喺巴黎影嘅大露背高衩吊帶裙造型照，更加疑似真空上陣，引起網民熱議。

【第5位】陳凱琳
陳凱琳（Grace）婚後雖然少咗喺熒幕出現，但就活躍喺社交平台，大方分享化妝教學同煮食片；曾經有次素顏上陣，被網民激讚膚質極好，素顏仲靚過化妝。陳凱琳亦被讚慳家，除咗會搭港鐵之外，拍片時使用嘅煮食煲被指又殘又舊，毫不修飾相當貼地。

【第4位】沈殷怡
沈殷怡（Shirley）法律碩士畢業，據知佢爸爸係前律政司副刑事檢控專員，曾代表政府檢控曾蔭權，而沈殷怡就想嘗試娛樂圈發展，因為拍攝ViuTV節目《美女郊遊遊》以性感bra top行山而人氣急升，被指有樣有身材，成為ViuTV女神；不過之後沈殷怡開始收起身材，直言之後嘅泳衣都會「封到上頸」。

【第3位】苟芸慧
苟芸慧幾年前因為甲狀腺失調而體重急升，高峰期更達170磅，被稱「肥苟」，但近年苟芸慧積極做運動修身，已回復女神最佳狀態。38歲嘅苟芸慧2018年與錫礦大王後人陸漢洋結婚，不過去年驚傳二人婚變，更有指苟芸慧已搬出愛巢，而且不時喺IG發文，例如其中一句：「愛自己，愛生活...分享有愛一刻，一直一直愛下去。」疑似暗示情變。

【第2位】Jessica（陳苡臻）
Jessica大學時已被封為學界女神，本身係一名模特兒，為《試當真》首次拍攝嘅短片「教父」一出街，隨即引起討論，網民仲指好希望Jessica可以做佢女朋友，而Jessica亦受廣告商寵愛，IG不時都會發布有關產品宣傳嘅照片。

【第1位】李佳芯
39歲李佳芯一直都係公認嘅女神級藝人，被指性格貼地唔造作。除咗演員身份，李佳芯仲曾經將過往生活點滴寫成散文集《心之所往》，又不時喺IG分享勉勵話語及環保等社會議題，可謂才女一名。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！