繽FUN星網線上棟篤笑 阮兆祥打頭陣出Gag 8.24開Talk

祥仔出名渾身是Gag,整個Show絕無冷場!
祥仔出名渾身是Gag,整個Show絕無冷場!

勇於創新的繽FUN星網又有新搞作,即將舉行首個線上收費棟篤笑Show,並邀得「笑匠」阮兆祥打頭陣,鐵定於8月24日開鑼,一連兩個星期三舉行兩場《何濟公止痛退熱散特約:阮兆祥的Talk》,圈中人緣甚佳的他廣邀好友出席,當中新秀師弟蘇志威、郭政鴻及黃翊齊撐場,前者更偕太太劉小慧恩愛現身,席間爆料指多得祥仔牽紅線,才得以娶到好太太!

蘇志威與劉小慧結婚25載恩愛如昔,經常孖咇出動,提到與阮兆祥由1986年認識至今,不經不覺已36年,蘇志威笑指人前人後之所以稱呼太太為Honey,原來背後與祥仔有關,他說:「當日祥仔叫女友做Honey,但把聲叫得好衰,當時我同小慧只係麻雀腳,成日學佢咁樣好癡纏講嘢,結果叫叫吓就拍埋拖。」小慧笑指祥仔間接成為媒人:「如果當日冇咩好感,都叫唔落啦!」蘇志威聞言即感激祥仔當日牽紅線,還笑指對方應對此懵然不知。

蘇志威劉小慧撐媒人

談到難忘事,蘇志威透露30年前與祥仔拍劇朝夕相對,即使沒有通告的日子,祥仔也會到訪他家,雙方就如同親人般:「任何時候,佢想我出現就會出現,祥仔個人孝順,對朋友好好,又重情,所以身邊好多真朋友。」

而郭政鴻比祥仔後一屆參加《新秀》,雙方合作無間,雖然他已離開無綫,但間中也會相約聚會:「有時傾吓想當年,記得以前大家都百厭過,收工一齊去飲酒,飲到第二日暈住開工,好在最後都冇事。」至於新秀年資比他們較淺的黃翊,難忘任祥仔主持的節目嘉賓,期間被盒內的青蛙嚇餐飽:「我好驚青蛙,但因為隻嘢喺箱入面睇唔到,否則會見到隻青蛙彈彈吓,咁就好慘!當時只係諗好想快啲完成,但最後都係冇膽將個頭伸入去,呢件事我記到依家。」

平日腦筋急轉彎的祥仔,今次於Solo棟篤笑中話題不斷,既抵死又啜核,輕易令全場笑聲不斷,如「你哋今日嚟唔係做阿哥,記住今日你哋嚟係做枚(妹)嘅!」想睇更多精彩內容,掃一掃QR Code入去以$88購買電子門票啦!

祥仔一眾多年好友撐場,令他開心又感動。
祥仔一眾多年好友撐場,令他開心又感動。
蘇志威與劉小慧多謝祥仔做媒人。
蘇志威與劉小慧多謝祥仔做媒人。
郭政鴻、黃翊與祥仔同是《新秀》出身,雞啄唔斷話當年。
郭政鴻、黃翊與祥仔同是《新秀》出身,雞啄唔斷話當年。