羅天宇飛出墊 撼頭傷頸

東方日報
·2 分鐘文章
劇集煞科,羅天宇(右)網晒合照多謝拍檔胡鴻鈞及何依婷。
劇集煞科,羅天宇(右)網晒合照多謝拍檔胡鴻鈞及何依婷。

羅天宇為新劇拍攝動作場口時出意外,因用力過度而飛出軟墊,結果撞親頭,傷及頸部肌肉,要做針灸及物理治療。經歷今次意外,他表示要找師傅惡補一下。

羅天宇日前為無綫劇集《十月初五的月光》拍攝一場飛撲馬路、差點被車撞倒的戲份時,因落位不準而飛出墊外,頭部撞地受傷。事後他接受訪問,坦言甚少拍攝動作戲,經驗淺,所以才用力過度:「劇組做足安全措施,幫我落晒墊,但我唔識就,太用力,都係自己唔小心。落地嗰下有少少Chok親條頸,不過唔太嚴重,所以繼續拍攝,點知第二日先開始痛,我去咗針灸同治療,今次之後真係要喺動作方面多多學習,搵個師傅認真學吓。(醫生話你傷勢點?)佢話我扯親左右頸嘅肌肉,依家已經好轉,係瞓覺轉身時會痛醒。」

鄺潔楹擋刀「見血」

同劇的鄺潔楹拍攝為父母出手擋刀而毀容的戲份時,飾演刀手的臨時演員轉身時不慎撼落攝錄機,眉頭流血,最終要換人。她憶述出事經過:「拍之前排咗幾次,個位好準,唔知點解正式嗰陣,機位同臨時演員嘅位置唔準,個臨時演員撞到眉頭係咁流血,好在當時佢戴住口罩拍,最終喺現場搵咗個武指頂上。(目睹過程驚唔驚?)嗰下佢撞得好應,紙巾都撳唔住啲血,希望佢快啲冇事!」

羅天宇飛身跌落軟墊時位置出錯,結果拉傷頸部。
羅天宇飛身跌落軟墊時位置出錯,結果拉傷頸部。