羅敏莊陳國邦愛女陳禛演童年梅艷芳 多得阮兆祥?
梅艷芳長兄梅啟明接受傳媒訪問,談及《梅艷芳》電影觀後感時,認為戲中描述佢兩位妹妹(梅艷芳與梅愛芳)童年嘅段落好兒戲,又認為演童年梅姐唔易做,要講天份。
飾演童年梅艷芳嘅,正正係羅敏莊陳國邦愛女陳禛。今日羅敏莊就喺facebook出post透露背後拍攝過程。
雖然電影今年先上畫,但係陳禛嘅戲份2018年就開拍。身為梅姐超級fans嘅羅敏莊提到,當時得知5歲嘅囡囡「傻更更」之下獲邀飾演梅姐童年時,心情極為興奮,但同時都要解決好多問題,例如解釋拍戲過程、梅姐係邊個、點解要化妝同戴假髮等等,仲要教佢講對白同埋唱懷舊金曲。
羅敏莊盛讚陳禛同媽咪一樣聰明,好快就明白一切,並且為喺大銀幕見到囡囡出現感到神奇!
陳禛樣貌睇落同童年梅姐有出入,最似嘅可能係表演天分,據知陳禛幫契爺阮兆祥做福祿壽演唱會嘉賓,首次踩上紅館舞台都表現淡定唔怯場,因此被《梅艷芳》導演梁樂民睇中。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!