老婆公開電話錄音 梅啟明問病榻中梅媽拎錢 窮風流搞外遇被恥笑

《梅艷芳》電影冇提及到梅姐同梅媽（覃美金）及大哥梅啟明嘅家庭事，但係梅媽同梅啟明「鍥而不捨」爭取梅姐遺產等等嘅花邊新聞，怕且連電影編劇都寫唔出。早前梅媽登報宣布同梅啟明斷絕母子關係，梅啟明尋日見傳媒，宣稱梅媽對登報一事毫不知情，並且指係姪仔梅柏麟一手促成。

殊不知有網媒表示收到梅啟明老婆Joey提供嘅電話錄音，聲稱係梅啟明分別同Joey及梅媽嘅交談內容。錄音當中，喺醫院留醫嘅梅媽多次叫梅啟明唔好再騷擾佢，希望一切平靜再打算，但係梅啟明就叫阿媽要俾錢。

而Joey喺對話中主要要求梅啟明兩樣嘢︰正式離婚，等梅啟明同發展外遇嘅泰國女子結婚，同埋還錢。據知，早前表示每月由梅媽手上收到2萬蚊生活費嘅梅啟明，冇俾錢照顧由馬來西亞來港嘅Joey兩母子，甚至向佢地攞錢用，合共借咗7千蚊，當中有1千蚊係小朋友零用錢。

對話中Joey不禁調侃梅啟明冇錢唔好玩女人，又叫梅等泰國女子養﹐仲透露個仔已經唔想見爸爸，而梅啟明酒後又會胡言亂語行為失控，甚至想迫個仔喺疫情期間去醫院探梅媽。Joey明確要求離婚同個仔返大馬，但梅支吾以對。至於還錢，梅啟明話要去醫院搵阿媽拎到錢先有得還，Joey鬧梅啟明連99歲阿媽都唔放過，梅回應「啲錢我應份攞嘅」，Joey就寸佢「嗰啲(遺產）你阿妹嘅錢，你點應份攞？」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！