老散智慧│小米是否一場鬧劇？（標基）

小米集團（1810）上周五收市前，因為網上媒體一則確定造車的消息，股價突然爆升超過12%，升至32元高位後，又有一堆獲利盤湧現，令小米收市升幅收窄至6%。

上周五小米升幅收窄，確實有兩方面的猜測。第一，小米做車消息只是故弄玄虛，很多重蟹貨人士見股價升幅上返30元，就即刻沽盤急急湧現，散貨離場，因為短時間內都不看好股價出現升幅，畢竟港股大升時期，小米真係郁都唔郁，反而係倒跌收場，散戶自然心灰離場。第二，小米真係有計劃做車，亦係專登放風試試水溫，睇下市場反應如何，股價係咪會聞風而起飛。見到市場反應唔錯，又唔想升得咁快，就即刻撳住個股價，唔比佢升得咁快。

自覺股價落後

諗返起上次恒大物業（6666）一日之內急升超過15%，公司在下午即刻停牌，到晚上先出公告公佈好消息，令公司股價可以長升長有，唔使一日之內爆升。

睇返小米，昨晚終發通告表示，一直關注電動汽車生態的發展，並就相關行業態勢進行持續評估及研究，但就電動汽車製造業務的研究還沒有到正式立項階段。

可以肯定的是，小米自身都覺得公司股價落後，似乎亦打從內心默認此消息能再度炒起公司的股價。早在通告發出前，有內地傳媒引述小米集團指，「晚點等公告」，表示暫不回應更多訊息，呢啲咁嘅回應，點會無心炒返起個股價？

標基

敢言敢為的小股民，股票投資愛好者

本欄逢周一刊出

【下載Yahoo財經APP】獲全球超過1700萬人信任的美股投資工具，跨平台同步你的投資組合，一APP掌握TSLA、AAPL、AMZN等美股最新走勢。