老闆貼身陪伴 好得寵！ 崔碧珈殺入樂壇 彈250萬鋼琴熱身

女星崔碧珈最近在工作上有新動向，簽約成為唱片公司旗下藝人，演而優則唱！近日她與新公司老闆一齊歎茶再去試彈價值約250萬的名貴鋼琴，全程獲對方貼身陪伴，非常得寵！

擁36G姣好身材的崔碧珈（Anita）一向工作多多，但近年卻變得低調，自去年10月出席公開活動後更鮮有露面。日前下午一時許，頭戴鴨舌帽、一身便裝打扮的她與唱片公司老闆鄧慧詩（Audrey）現身尖沙咀一間Cafe，Anita先到櫃枱落單，之後便返回座位，兩人邊飲邊傾，全程雞啄唔斷，約半小時後結伴離去。

隨後2人徒步前往附近琴行，她們似乎是熟客仔，甫入店內便獲專人接待，帶她們睇鋼琴及從旁講解。她們睇了一部全場最貴、價值約250萬的鋼琴，13歲便考獲8級鋼琴的Anita見到靚琴即時技癢，坐下大晒琴技，之後更拿出電話影相留念，又跟Audrey合照。此外，她又試了一部張敬軒在演唱會中用過的透明鋼琴及另一部價值逾百萬的鋼琴，她對百萬鋼琴情有獨鍾，拿起價錢牌研究一番，而睇琴期間，Audrey貼身陪伴，照顧周到。

簽10年長約

Anita事後受訪時坦言會加盟「框格音樂事務」旗下：「2017年同舊公司完咗約之後就冇續約，一直係自己工作室，依家再簽番經理人公司，簽咗10年長約畀佢哋。（你簽唱片公司，嚟緊做歌手？）遲啲就會公布喇！」