(更新)聲夢幫冼靖峰開直播講「03年？即係沙士死剩種呀」電訊商出聲明「並非代言人」

(即時更新)電訊商3香港晚上發聲明，強調只係邀請冼靖峰出席過活動，並非品牌代言人，言論與公司無關，並保留追究影響商譽損失嘅權利。

而家好多歌手都會開網上直播音樂會，做Live唔止考唱功，仲要學識唔好亂講嘢。舊年參加《聲夢傳奇》入咗決賽嘅冼靖峰就因為喺直播講錯嘢被負評。

上星期Archie（冼靖峰）、Felix（林智樂）、Lolita（蔡愷穎）同Windy（詹天文）4個「聲夢幫」開直播音樂會，間場傾偈環節講起大家邊年出生，Felix表示同Lolita都係2003年出世，Archie冇端端插咀講句「03年？即係沙士死剩種呀，係咪呀？」。4個年青人經驗有限唔識收科，Lolita只係識俾反應「講呢啲？」，衰多口嘅Archie慢半拍先至話「講笑講笑」兜返。

本來事件仲未發酵，直至尋晚「聲夢幫」嘅鍾柔美(Yumi)、姚焯菲(Chantel)、詹天文(Windy)、何晉樂(Rock)同冼靖峰再開live，冼靖峰完場前就上次嘅言論道歉，話自己「講咗啲唔應該講嘅說話」，唔少網民先至知有咁嘅事。同場嘅何晉樂想搞下氣氛，就話「好似Chantel（姚焯菲）都成日話我肥」，冼靖峰於是拉返正題「好對唔住，真係講咗啲好唔應該講嘅說話啦，知道自己唔夠成熟」。

冼靖峰曾經參加過ViuTV《全民造星2》但係去到60強就被淘汰，隔年參加TVB《聲夢傳奇》殺入決賽，以總排名第4畢業。冼靖峰今個月中推出首支個人單曲《一個人的幸運》，MV推出至今半個月，網上收看次數逾80萬。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！