聲夢傳奇｜網傳炎明熹唔簽約致三甲不入 拍MV企位由正中變邊緣人

TVB歌唱選秀節目《聲夢傳奇》戰况緊湊，決賽將在今個月中舉行，選出終極冠軍。不過，一向被視為大熱嘅炎明熹（Gigi）近日聲帶受損，喺上周六（3日）播出嗰集演唱《吻別》一曲大失手，被評審批評一開口就唱錯歌詞又揀錯歌。而網傳聽晚播出一集中，炎明熹再次失準，與文凱婷（Aeren）雙雙跌入淘汰邊緣，最後文凱婷被淘汰；亦有傳炎明熹因仲未肯同TVB簽約，最後三甲不入。

炎明熹之前出席活動就透露，簽約與否會交畀屋企人決定，更加講明以學業為重。對於炎明熹三甲不入嘅消息，網民就表示唔係好相信，認為炎明熹係5強中有一定實力，TVB無理由唔畀獎炎明熹。不過，近日一班《聲夢傳奇》學員同導師JW、泳兒拍攝奧運主題曲《奪金》MV時，無論係拍攝企位定之後接受媒體訪問，炎明熹都被安排企係邊位位置，同以前企正中間有明顯對比，相反盛傳已簽約嘅姚焯菲（Chantel）以及表現後來居上嘅鍾柔美（Yumi）就拍住JW、泳兒企係置中位置。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！