聲夢傳奇｜14歲姚焯菲 《戀愛預告》點擊破200萬 成功揮低大熱門炎明熹

無綫歌唱選秀節目《聲夢傳奇》鬥得如火如荼，當中年僅14歲嘅姚焯菲（Chantel）憑甜美歌聲演唱《戀愛預告》震撼全城，被封為「國民初戀」，節錄片段喺YouTube點擊人次持續飆升，10日點擊已經破200萬，繼續穩佔熱爆影片第1位，而佢嘅IG追蹤人數更由2萬急升至4.3萬，真係瘋狂吸粉。

佢嘅粉絲呼籲網民幫手推高另一首參賽歌曲《逃生門》嘅點擊率，真係相當犀利。佢嘅粉絲更用「颱風消息」形容Chantel，「超強颱風焯菲（Chantel）集結在香港東南偏南約180萬view，即在北緯，李生嗰度，東經，JW嗰度附近，預料向西北或西北偏西移動，時速約1萬view，移向廣東西部沿岸。」Chantel都大讚搞笑，未諗過可以咁樣形容佢。反而之前被睇高一線嘅炎明熹（Gigi），早前都有首《沒有你還是愛你》大受歡迎，但係有啲後勁不繼，片段點擊人數只得151萬，Chantel成功撼贏大熱門Gigi。

另外，今日仲有報道指Chantel雖然未簽任何嘅唱片公司，不過所有入圍嘅參賽者都已經同無綫簽咗五年基本藝員合約，姚爸爸就話Chantel目前以學業為重。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！