聲夢傳奇2｜星級導師陣容公開 林二汶被網民批食兩家茶禮

TVB選秀節目《聲夢傳奇2》喺噚日（19日）舉行記者會，除咗23位學員再度登場之外，大會隨即公佈新賽制及6位星級導師，包括Gin Lee（李幸倪）、泳兒、JW（王灝兒）、布志綸（Alan）、林奕匡（Phil）及林二汶。

今次嘅賽制將分紅和藍兩隊，紅隊總監係Eric Kwok，而藍隊總監就係陳奐仁。至於星級導師方面，Gin Lee、泳兒及JW繼續擔任導師，而林二汶、布志綸及林奕匡就取代上季導師周柏豪、衛蘭及江海迦（Aga）。林二汶曾經係ViuTV《全民造星3》導師，今次就為TVB《聲夢傳奇2》擔任導師，佢就認為四面台好新鮮，係一個訓練嘅好開始。而佢喺接受傳媒訪問時就話兩個節目嘅形式唔同，仲笑話會揀男學員先，而佢亦比較着重內涵、真誠、有自信，不過如果佢哋曳嘅會照鬧，如果有心水學員就會搶到底。

林二汶係ViuTV常客，係《晚吹－又要威 又要戴頭盔》及《對號入座》等節目主持及為《全民造星III》擔任導師，去年花姐更邀請佢冧莊為《全民造星IV》導師，不過佢就冇答應，並指自己籌備緊音樂教室。點知佢喺11月嘅時候就現身TVB《萬千星輝賀台慶》演唱。唔少網民都對林二汶擔任《聲夢傳奇2》好大反應，再一次被網民批佢「食兩家茶禮」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！