聲生不息︳曾比特短髮look曝光!由學界比賽唱到贏林子祥 為做歌手被炒魷

曾比特
曾比特

《聲生不息》播出以來,出道第2年嘅曾比特應該係節目大贏家。去年出道嘅Mike,遇著其餘2位同佢一樣都係《全民造星》出身嘅「校友」Edan 呂爵安及MC張天賦,雖然力保新人獎三甲,但聲勢總比前兩者爭少少(甚至連Chill Club頒獎禮都輸俾193……)。不過因為唱片公司緣故,曾比特有機會透過《聲》北上發展,甚至因為節目喺內地爆紅,可以話係後發先至。

有睇節目都留意到,28歲嘅Mike國語唔錯,原來佢喺內地汕尾出世,童年時移居香港,可惜爸爸早逝,Mike同媽媽、哥哥及家姐生活。中學時已經想做歌手嘅Mike,參加過無數個歌唱比賽,喺其中一個學界比賽拎到季軍,而嗰界嘅冠軍係《殘酷一叮》「莫生」莫凱謙,得獎者仲有《造星3》嘅陳葦璇同雲浩影(Cloud)!

右二係Mike,同屆得獎者仲有《造星3》Cloud(左一)同陳葦璇(左二),《殘酷一叮》莫凱謙(中)係比賽冠軍。
右二係Mike,同屆得獎者仲有《造星3》Cloud(左一)同陳葦璇(左二),《殘酷一叮》莫凱謙(中)係比賽冠軍。
聲生不息︳曾比特短髮look曝光!
聲生不息︳曾比特短髮look曝光!

Mike參加咁多比賽都係想得到入行機會,終於喺2019年參加《全民造星II》打入決賽,最終得到第8名。比賽導師之一Eric Kwok非常欣賞Mike,將佢引薦俾環球,仲為佢打造首支單曲《我不如》。

眾所周知,做歌手出道初期落袋嘅唔多。曾比特成為歌手之後,仍然做全職音響技術人員兼教唱歌,用嚟幫補開支。但因為歌手工作時間唔穩定,Mike結果連音響工程份工都冇埋。查實入行前已經相當識諗,做婚禮歌手寓工作於娛樂,又試過做中環海濱嘉年華散工,聖誕節睇住人拍拖自己就開工,難怪Eric Kwok安排佢專攻慘情歌。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!