聲生不息｜歌手名單出爐 曾比特加入網民感失望

早前有傳王祖藍辭任無綫首席創意官一職，但無綫否認亦指王祖藍即將擔任《聲生不息》主持之一，帶領香港同內地歌手重新演繹港樂經典，而節目將於星期日（24日）首播。

《聲生不息》歌手名單已經公佈，包括多位香港及內地殿堂級歌手與新生代歌手，包括林子祥、葉蒨文、李克勤、楊千嬅、李健、林曉峰、李玟、周筆暢、毛不易、劉惜君、馬賽克、炎明熹、曾比特、安崎、單依純及魔動閃霸等等。當中《聲夢傳奇》炎明熹以及《全民造星II》出身嘅曾比特將會同殿堂級歌手對戰。

曾比特喺2019年參加ViuTV選秀真人騷《全民造星II》，最後取得第八名，並獲導師Eric Kwok賞識及提攜，上年加入環球唱片成為樂壇新人，首支派台歌曲《我不如》更唱到街知巷聞。唔少網民知道佢參加《聲生不息》後，紛紛留言表示對佢失望，例如「今鋪真係..「我不如過街老鼠」」、「因為好歌要unfollow你、請珍重」、「人民幣好賺」、「失望」、「音樂無邊界 人民幣大晒」及「講真有啲失望嘅但係可能係公司迫嘅呢 其實講真以你這個根本唔需要返大陸搵金 你上年都攞新力軍銅獎啦 完全唔知環球係想搞咩 我覺得就算係TVB出節目都冇咩問題但係上大陸就不了」等等。

另外，王祖藍亦有發表文章表示港樂對佢嚟講好重要，佢仲指香港回歸25週年和香港TVB台慶55週年，佢一直諗可以做啲咩，後來呢個節目總導演話想製作一檔創新音樂綜藝，於是佢哋一拍即合，亦有《聲生不息》嘅諗法，並最終同芒果TV合作。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！